سردیوں کا موسم ایکویریم کی مچھلیوں کی حیات کے لیے ایک بڑا خطرہ بن سکتا ہے، خاص طور پر وہ سرد علاقے جہاں درجہ حرارت تیزی سے گر جاتا ہے۔

اگرچہ ہم سردیوں میں خود کو گرم رکھنے کے لیے سویٹرز اور چائے کا لطف اٹھاتے ہیں، مگر ایکویریم کی مچھلیوں کے لیے یہ موسم بہت مشکل ثابت ہو سکتا ہے۔

اچھی خبر یہ ہے کہ کچھ احتیاطی تدابیر اور دیکھ بھال سے آپ اپنی مچھلیوں کو سردیوں میں محفوظ رکھ سکتے ہیں۔

نہ گیزر ، نہ بجلی کے بل کی ٹینشن، ٹھنڈ میں ٹنکی کا پانی گرم رکھنے کے آسان طریقے

مچھلیاں سرد خون والی جان دار مخلوق ہیں اور ان کا جسم اپنے ارد گرد کے پانی کے درجہ حرارت پر منحصر ہوتا ہے۔ جب پانی کا درجہ حرارت بہت کم ہو جاتا ہے، تو مچھلیوں کی حرکت کم ہو جاتی ہے، وہ کم کھاتی ہیں اور ان کی قوت مدافعت کمزور پڑ جاتی ہے۔ اس سے بیماریوں، فنگس اور دیگر مسائل کا سامنا ہوسکتا ہے۔

سردیوں میں پانی کے درجہ حرارت کو مستحکم رکھنے کے لیے ہیٹر کا استعمال ضروری ہے۔ بہت سے لوگ یہ سمجھتے ہیں کہ سردیوں میں پانی کا درجہ حرارت اتنا کم نہیں ہوتا، لیکن یہ بات حقیقت سے مختلف ہے۔ یہاں تک کہ چند ڈگری کا فرق بھی مچھلیوں کو نقصان پہنچا سکتا ہے۔

سردیوں میں مچھلیوں کی حرکت کم ہو جاتی ہے اور ان کی بھوک بھی کم ہو جاتی ہے۔ اگر آپ زیادہ کھانا دیں گے تو وہ کھانا پانی میں سڑ جائے گا، جس سے پانی میں امونیا پیدا ہوگا اور مچھلیوں کو نقصان پہنچے گا۔ اس لیے سردیوں میں ایکویریم کی مچھلیوں کم مقدار میں کھانا دینا زیادہ فائدہ مند ہوتا ہے۔ اور جو کھانا نہیں کھایا جائے، اسے فوراً نکال کر ضائع کردیں۔

سردیوں میں ایکویریم کے پانی کو بدلنے میں بھی احتیاط ضروری ہے کیونکہ سرد پانی مچھلیوں کے لیے نقصان دہ ثابت ہو سکتا ہے۔ اگر آپ پانی تبدیل کرنا چاہتے ہیں تو ایک بار میں 20 سے 25 فیصد پانی کی تبدیلی کریں، اور سرد پانی کو براہ راست ٹینک میں نہ ڈالیں۔ پانی کو پہلے تھوڑی دیر کے لیے رکھ کر اس کا درجہ حرارت ٹینک کے مطابق کریں۔

سردیوں میں مچھلیوں کی حالت پر نظر رکھنا بہت ضروری ہے۔ اگر آپ کی مچھلیاں پانی کی سطح پر ساکت نظر آئیں، یا ان کے پنکھ ہلنا بند کردیں، یا وہ خوراک لینے سے انکار کریں، تو یہ سب اشارے ہیں کہ کچھ غلط ہو سکتا ہے۔ فوری طور پر پانی کا درجہ حرارت چیک کریں اور اگر ضروری ہو تو ان کا علاج کریں۔

ٹھنڈ میں منہ پر کمبل اوڑھ کر سونا کتنا مہنگا پڑ سکتا ہے؟

سردیوں میں بجلی کی بندش عام بات ہے، اور یہ ایکویریم کی مچھلیوں کے لیے ایک خطرہ بن سکتی ہے۔ اگر بجلی بند ہو جائے تو ٹینک کو کمبل یا تولیے سے ڈھانپ کر گرمی برقرار رکھنے کی کوشش کریں۔

اگر آپ نیا ایکویریم منتخب کر رہے ہیں تو سردیوں کے موسم کے لیے ایسی مچھلیوں کا انتخاب کریں جو ٹھنڈے پانی کو بہتر طور پر برداشت کر سکیں، جیسے گولڈفش یا زیبرا ڈینیوز۔ ایسی مچھلیوں کو کم درجہ حرارت میں تکلیف نہیں ہوتی اور وہ زیادہ عرصے تک زندہ رہتی ہیں۔

سردیوں میں ایکویریم کی مچھلیوں کی دیکھ بھال کوئی پیچیدہ عمل نہیں ہے۔ یہ سب کچھ مستحکم درجہ حرارت، مناسب خوراک، صاف پانی اور فوری ردعمل سے جڑا ہوتا ہے۔

جیسے آپ اپنے بزرگوں کی دیکھ بھال کرتے ہیں ویسے ہی مچھلیوں کو بھی سردیوں میں خصوصی توجہ کی ضرورت ہوتی ہے۔ اس طرح آپ کی مچھلیاں بھی سردیوں کے موسم میں صحت مند رہیں گی اور آپ کا ایکویریم ہمیشہ خوش و آباد رہے گا۔