پاکستان کے ای اسپورٹس آئیکون اور عالمی شہرت یافتہ ٹیکن اسٹار کھلاڑی ارسلان صدیق عرف ارسلان ایش کے گھر پہلے بیٹے کی ولادت ہوئی ہے۔

انہوں نے یہ خوشی کی خبر اپنے مداحوں کے ساتھ انسٹاگرام پر شیئر کی ہے۔

پوسٹ میں اپنی اہلیہ کے ہاتھ اور نومولود بچے محمد ایان کے ہاتھ کی تصویر کے ساتھ کیپشن میں شکر اور خوشی کا اظہار کرتے ہوئے بتایا کہ الحمداللہ وہ ایک بیٹے سے نوازے گئے ہیں۔ انہوں نے یہ بھی لکھا کہ اب ہماری فیملی مکمل محسوس ہو رہی ہے۔

ارسلان ایش دنیا کے عظیم ترین ٹیکن کھلاڑیوں میں شمار کیے جاتے ہیں۔ ٹیکن ایک مقبول فائٹنگ ویڈیو گیم سیریز ہے جس میں کھلاڑی مختلف کرداروں کے ساتھ مارشل آرٹس کی تکنیکیں استعمال کرتے ہوئے ایک دوسرے سے مقابلہ کرتے ہیں۔ 1994 میں شروع ہونے والی یہ سیریز آج دنیا بھر کے بڑے ای اسپورٹس مقابلوں خاص طور پر ایوولوشن چیمپئن سیریز (EVO) اور ٹورنامنٹ کا اہم حصہ بن چکی ہے۔

ارسلان ایش نے بچپن میں گیمنگ آرکیڈز سے کھیل کا آغاز کیا اور پھر دنیا بھر کے بڑے مقابلوں میں فتح حاصل کی۔ اگست 2025 میں انہوں نے لاس ویگاس میں اپنا چھٹا ایوو کراؤن حاصل کیا۔ ارسلان کو دنیا کے بہترین ٹیکن کھلاڑیوں میں شمار کیا جاتا ہے

2025 میں اولاد پانے والے بولی وُڈ کے خوش نصیب ستارے

پاکستان کے اس ہیرو کی پوسٹ نہ صرف ان کی ذاتی خوشی کا اظہار ہے بلکہ ان کے مداحوں کے لیے بھی خوشی کے لمحات ہیں، جو اپنے پسندیدہ گیمنگ اسٹار کو مبارکباد کے پیغامات سے نواز رہے ہیں۔ مداحوں نے اس خوشی کی خبر پر اپنی دعائیں اور محبت بھرے پیغامات شئیر کئے ہیں جس نے خوشیوں کو مزید دوبالا کردیا ہے۔