کراچی کے علاقے بلاول ہاؤس چورنگی کے قریب سے مبینہ طور پر چوری ہونے والا سیف سٹی کیمروں کا ڈسٹری بیوشن بکس پولیس کو خالی پلاٹ سے مل گیا۔ حکام کے مطابق بکس جائے وقوع سے زیادہ دور نہیں بلکہ چند ہی قدم کے فاصلے پر موجود خالی پلاٹ سے برآمد ہوا ہے۔

پولیس حکام کا کہنا ہے کہ یہ بکس سیف سٹی کیمروں کے نیٹ ورک کا ایک اہم حصہ تھا جو چند روز قبل بلاول ہاؤس چورنگی کے قریب سے غائب ہوگیا تھا۔

ترجمان پولیس کے مطابق، بکس ملنے کے بعد تحقیقات جاری ہیں کہ وہ خالی پلاٹ تک کیسے پہنچا اور اس واقعے میں کون ملوث ہو سکتا ہے۔

پولیس کا کہنا ہے کہ سی سی ٹی وی فوٹیج اور دیگر شواہد کا جائزہ لیا جا رہا ہے تاکہ بکس چوری یا منتقلی کے وقت کی درست تفصیلات سامنے آ سکیں۔

سندھ کے کون سے شہروں میں سیف سٹی منصوبہ شروع ہوگا ؟ مراد علی شاہ کا اہم اعلان

اب ڈرونز کریں گے مجرموں کا پیچھا، پنجاب سیف سٹی کا نیا سیکیورٹی پلان تیار

ادھر ، ڈی جی سیف سٹی اتھارٹی آصف اعجاز شیخ کے مطابق، چوری کا واقعہ بلاول ہاؤس چورنگی کے قریب پیش آیا، جہاں سے ڈسٹری بیوشن بکس غائب ہوا۔ انہوں نے بتایا کہ بکس میں لاکھوں روپے مالیت کا سامان موجود تھا۔

آصف اعجاز شیخ نے اس واقعے کو انتہائی تشویشناک قرار دیتے ہوئے کہا کہ جس منصوبے کا مقصد شہر کو محفوظ بنانا ہے، اس سے سامان کی چوری لمحہ فکریہ ہے۔