پاکستان کرکٹ بورڈ (پی سی بی) نے اعلان کیا ہے کہ نومبر میں ہونے والی سہ ملکی ٹی ٹوئنٹی سیریز میں افغانستان کی جگہ اب زمبابوے کی ٹیم شریک ہوگی۔ افغانستان کے انکار کے بعد زمبابوے نے پی سی بی کی دعوت قبول کرلی ہے۔ سہ ملکی سیریز میں اب پاکستان، زمبابوے اور سری لنکا کی ٹیمیں ایکشن میں نظر آئیں گی۔

یہ سیریز 17 نومبر سے 29 نومبر تک راولپنڈی اور لاہور میں کھیلی جائے گی۔ پی سی بی کے مطابق سیریز کا شیڈول تبدیل نہیں کیا گیا، تمام میچز پہلے سے طے شدہ مقامات پر ہی ہوں گے۔

ذرائع کے مطابق افغان کرکٹ بورڈ نے پاکستان میں شیڈول سہ ملکی ٹی ٹوئنٹی سیریز میں شرکت سے انکار اس وقت کیا جب دونوں ممالک کے درمیان سرحدی کشیدگی اپنے عروج پر ہے۔ افغان بورڈ نے سیکیورٹی خدشات اور موجودہ حالات کا حوالہ دیتے ہوئے ٹیم کو پاکستان نہ بھیجنے کا فیصلہ کیا۔

پی سی بی نے افغانستان کے فیصلے پر افسوس کا اظہار کیا ہے۔ ترجمان پی سی بی کا کہنا ہے کہ پاکستان اور افغانستان کے کرکٹ تعلقات ہمیشہ خوشگوار رہے ہیں، اور پاکستان مستقبل میں ان روابط کو مزید بہتر بنانے کی کوشش کرے گا۔ تاہم، پی سی بی نے افغان بورڈ کے فیصلے کا احترام کرتے ہوئے متبادل ٹیم کے طور پر زمبابوے کو دعوت دی، جس نے فوری طور پر شرکت کی تصدیق کردی۔

پی سی بی کے مطابق، سیریز کے دوران شائقین کرکٹ کو بہترین مقابلے دیکھنے کو ملیں گے۔ زمبابوے ٹیم کی شمولیت سے نہ صرف سیریز کا تسلسل برقرار رہے گا بلکہ پاکستان میں کرکٹ سرگرمیوں کو بھی تقویت ملے گی۔

کرکٹ ماہرین کا کہنا ہے کہ افغانستان کی دستبرداری اگرچہ افسوسناک ہے، تاہم زمبابوے کی شمولیت سے سیریز میں دلچسپی برقرار رہے گی، اور پاکستانی شائقین ایک بار پھر راولپنڈی اور لاہور کے میدانوں میں بین الاقوامی کرکٹ کے جوش و خروش سے لطف اندوز ہوں گے۔