پاکستان نے مقامی سطح پر تیار کردہ جدید کروز میزائل ”فتح-4“ کا کامیاب تربیتی تجربہ کیا ہے۔ پاک فوج کے شعبہ تعلقات عامہ (آئی ایس پی آر) کے مطابق، فتح-4 میزائل 750 کلومیٹر تک اپنے ہدف کو کامیابی سے نشانہ بنانے کی صلاحیت رکھتا ہے۔

ترجمان پاک فوج کے مطابق فتح-4 جدید ایویونکس اور نیویگیشنل سسٹمز سے لیس ہے اور اس کی ٹیرین ہَگنگ پرواز کی خصوصیت اسے دشمن کے دفاعی نظام سے بچنے میں مدد دیتی ہے۔

یہ میزائل پاکستان آرمی کے روایتی میزائل سسٹم کی رینج، مؤثریت اور بقا کو مزید بہتر بنانے میں اہم کردار ادا کرے گا۔

آئی ایس پی آر کے مطابق تربیتی لانچ کا مشاہدہ چیف آف جنرل اسٹاف، سینئر عسکری افسران، دفاعی سائنسدانوں اور انجینئرز نے کیا۔

اس کامیاب تجربے پر صدر مملکت، وزیر اعظم، چیئرمین جوائنٹ چیفس آف اسٹاف کمیٹی اور تینوں مسلح افواج کے سربراہان نے قوم، سائنسدانوں اور فوج کو مبارکباد دی ہے۔

فتح-4 کا یہ تجربہ پاکستان کے دفاعی نظام کی خود انحصاری اور تکنیکی ترقی کی جانب ایک اور اہم قدم قرار دیا جا رہا ہے۔