پاکستان کرکٹ بورڈ (پی سی بی) نے ضابطہ اخلاق کی خلاف ورزی پر بھارتی ٹیم کے کپتان سوریا کمار یادیو کے خلاف شکایت درج کرائی تھی جس کے بعد کے ایک بورڈ نے اور بھارتی کھلاڑی کے خلاف آئی سی سی میں شکایت درج کرا دی ہے۔

ذرائع کا مطابق پی سی بی نے بھارتی ٹیم کے فاسٹ بولر ارشدیپ سنگھ کے خلاف آئی سی سی میں درخواست دے دی ہے۔

ذرائع کا بتانا ہے پاکستان نے آئی سی سی میں درج کرائی گئی شکایت میں کہا ہے کہ ارشدیپ سنگھ نے 21 ستمبر کو میچ کے اختتام پر انتہائی نازیبا اشارے کیے تھے، جو آئی سی سی کوڈ آف کنڈکٹ کی خلاف ورزی تھی۔

درخواست میں کہا گیا ہے کہ ارشدیپ سنگھ نے تماشائیوں کو غیر اخلاقی اشارے کیے تھے، بھارتی کھلاڑی نے نازیبا اشارے کر کے کھیل کی ساکھ مجروح کی تھی۔

ذرائع نے مزید بتایا ہے کہ پی سی بی حکام نے ارشدیپ کے خلاف ضابطہ اخلاق کی خلاف ورزی پر ایکشن کا مطالبہ کیا ہے۔

یاد رہے کہ اس سے قبل پاکستان کرکٹ بورڈ نے بھارتی ٹیم کے کپتان سوریا کمار یادیو کے خلاف بھی آئی سی سی میں درخواست دائر کی تھی جس میں کہا گیا تھا کہ میچ کے بعد پریس کانفرنس میں سوریا کمار یادیو نے سیاسی باتیں کر کے کھیل کی ساکھ کو نقصان پہنچانے کی کوشش کی تھی۔

جس کے بعد آئی سی سی کی جانب سے بھارتی کپتان پر میچ فیس کا 30 فیصد جرمانہ عائد کیا گیا تھا۔