پنجاب کے ضلع میانوالی کے علاقے کندیاں میں سی ٹی ڈی کی ایک خفیہ اطلاع پر مبنی کارروائی کے دوران 2 دہشت گرد ہلاک ہو گئے۔

کاؤنٹر ٹیررازم ڈیپارٹمنٹ (سی ٹی ڈی) کے ترجمان کے مطابق، یہ کارروائی انٹیلی جنس بیسڈ آپریشن کے تحت کی گئی، جس میں فورسز کو دہشت گردوں کی موجودگی کی اطلاع ملی تھی۔

ترجمان سی ٹی ڈی کا کہنا ہے کہ آپریشن کے دوران دہشت گردوں سے شدید فائرنگ کا تبادلہ ہوا جس کے نتیجے میں دو دہشت گرد موقع پر ہی مارے گئے، جب کہ دیگر چھ دہشت گرد اندھیرے کا فائدہ اٹھاتے ہوئے فرار ہو گئے۔

ترجمان کے مطابق ہلاک دہشت گردوں کے قبضے سے رائفلیں، دستی بم، بارودی مواد، گولیاں اور دیگر اسلحہ برآمد ہوا ہے۔ فرار ہونے والے دہشت گردوں کی تلاش کے لیے علاقے میں سرچ آپریشن جاری ہے، اور قریبی مقامات کی نگرانی سخت کر دی گئی ہے۔