پاکستان تحریک انصاف (پی ٹی آئی) نے 5 اگست کو ایف نائن پارک میں جلسے کے لیے انتظامیہ کو درخواست دے دی۔

تفصیلات کے مطابق پاکستان تحریک انصاف نے عمران خان کی کال پر 5 اگست کو اسلام آباد کے ایف 9 پارک میں جلسہ کرنے کا اعلان کردیا۔

پی ٹی آئی اسلام آباد ریجنل کے صدر عامر مسعود مغل نے جلسے کی اجازت کے لیے ڈپٹی کمشنر اسلام آباد کو باضابطہ درخواست دے دی، درخواست پر عامر مسعود مغل اور جنرل سیکرٹری ملک عامر علی کے دستخط ہیں۔

درخواست میں مؤقف اختیار کیا گیا ہے کہ 5 اگست کو شام 4 بجے ایف نائن پارک میں جلسے کی اجازت دی جائے، جلسہ تمام کارکنان کو متحرک رکھنے کے لیے سیاسی سرگرمیوں کا حصہ ہے، جلسے کے دوران تمام انتظامات نظم و ضبط کے ساتھ کیے جائیں گے۔

درخواست میں مزید کہا گیا کہ ضلعی انتظامیہ اورقانون نافذ کرنے والے اداروں کے ساتھ تعاون کیا جائے گا، شرکا کے تحفظ کو یقینی بنانے کے لیے سیکیورٹی فراہم کی جائے۔

درخواست میں یہ بھی کہا گیا کہ پبلک سیفٹی اور پارک کے استعمال کے تمام قواعد و ضوابط پر عمل درآمد کیا جائے گا۔