**راولپنڈی میں سدرہ عرب نامی خاتون کے قتل کی تفتیش میں اہم پیش رفت سامنے آئی ہے۔ پولیس نے قبرستان میں لاش لانے کی سی سی ٹی وی فوٹیج حاصل کر لی، فوٹیج میں 15 سے زائد افراد کو لاش کے ہمراہ قبرستان داخل ہوتے ہوئے دیکھا جا سکتا ہے۔ جلد مزید گرفتاریوں کا امکان ہے۔ تفتیشی ٹیم مقتولہ کے والد کو لے کر لاہور روانہ ہو گئی، ڈی این اے میچ کروایا جائے گا۔ **

ذرائع کے مطابق لاش کو ایک لوڈر رکشہ میں لے کر قبرستان کے اندر لایا گیا جہاں شدید بارش کے باعث ملزمان قبرستان کمیٹی کے کمرے میں چھپ کر بارش کے ختم ہونے کا انتظار کررہے تھے۔

راولپنڈی میں غیرت کے نام پر خاتون کا قتل: گرفتار گورکن کے سنسنی خیز انکشافات سامنے آگئے

ویڈیو میں دیکھا جاسکتا ہے کہ جیسے ہی رکشہ قبرستان پہنچا، تمام افراد باہر نکلے اور لاش کو قبر میں دفن کیا۔ دفنانے کے بعد ملزمان نے قبرستان میں موجود نلکے سے ہاتھ دھوئے اور وہاں سے روانہ ہو گئے۔

پولیس نے سی سی ٹی وی فوٹیج کا تفصیلی جائزہ لینا شروع کردیا ہے اور فوٹیج میں موجود افراد کی شناخت کے لیے کارروائی جاری ہے۔ شناخت ہونے والے ملزمان کی گرفتاری کے لیے متعدد چھاپے مارے جا رہے ہیں۔

جرگے کے حکم پر قتل ہونے والی لڑکی کی قبر کشائی کے آرڈر جاری، کب ہوگی؟

راولپنڈی پولیس کی تفتیشی ٹیم نے مقتولہ سدرہ عرب کے والد کو قانونی کارروائی کے لیے لاہور روانہ کر دیا ہے جہاں پنجاب فرانزک سائنس ایجنسی میں ڈی این اے میچ کروایا جائے گا۔

پولیس نے لاش کے نمونے پہلے ہی لاہور بھیج دیے تھے تاکہ ڈی این اے میچنگ کے عمل کو جلد از جلد مکمل کیا جا سکے۔