رینالہ خورد کے نواحی علاقے میں معذور شخص کو تشدد کا نشانہ بنانے والے ملزم کو پولیس نے گرفتار کرلیا جبکہ واقعے کی ویڈیو سوشل میڈیا پر وائرل ہونے کے بعد ڈی پی او نے ملزم کو گرفتار کرنے کی ہدایت کی تھی۔

تفصیلات کے مطابق رینالہ خورد کے تھانہ صدر کے نواحی علاقے میں گزشتہ روز معذور شخص پر تشدد کا افسوسناک واقعہ پیش آیا۔

واقعے کی ویڈیو سوشل میڈیا پر وائرل ہوتے ہی ڈی پی او اوکاڑہ راشد ہدایت نے نوٹس لیتے ہوئے ملزم کی فوری گرفتاری کا حکم دیا، جس کے بعد پولیس نے ملزم کو گرفتار کرلیا اور پولیس کی مدعیت میں مقدمہ درج ہوگیا۔

پولیس کے مطابق معذور شخص نے موٹر سائیکل سوار کو گالیاں دیں، جس پر مشتعل ہو کر ملزم نے اسے تشدد کا نشانہ بنایا۔

ڈی پی او راشد ہدایت کا کہنا ہے کہ کسی کو بھی قانون کو اپنے ہاتھ میں لینے کی ہرگز اجازت نہیں دی جائے گی اور ملزم کو قانون کے مطابق قرار واقعی سزا دلوائی جائے گی۔