لاڑکانہ کی تحصیل ڈوکری کے گاؤں صاحب خان ملانو میں دل دہلا دینے والا واقعہ پیش آیا جہاں کھیلتے ہوئے تالاب کے قریب جانے والی ایک ہی خاندان کی چار کمسن بچیاں ڈوب کر جاں بحق ہو گئیں۔ پولیس کے مطابق بچیوں کی لاشیں آج تالاب سے برآمد کر لی گئیں۔

پولیس کے مطابق جاں بحق بچیوں میں 5 سالہ بشریٰ، 6 سالہ فاطمہ، 7 سالہ حمیرا اور 8 سالہ آمنہ شامل ہیں۔ واقعے کی تفصیل بتاتے ہوئے پولیس نے کہا کہ بچیاں گزشتہ روز کھیلتے ہوئے تالاب کے پاس چلی گئیں جہاں ایک بچی کا پاؤں پھسل گیا اور وہ پانی میں جا گری۔ باقی تینوں بچیاں اسے بچانے کی کوشش میں تالاب میں کود گئیں لیکن بدقسمتی سے چاروں بچیاں پانی میں ڈوب گئیں۔

المناک واقعے پر اہل علاقہ نے انتظامیہ سے مطالبہ کیا ہے کہ دیہی علاقوں میں موجود کھلے اور غیرمحفوظ تالابوں کو محفوظ بنایا جائے تاکہ مستقبل میں ایسے دلخراش واقعات سے بچا جا سکے۔