وزیراعظم شہباز شریف کے تعلیمی وژن کے تحت ملک کے پسماندہ علاقوں میں دانش اسکولز کے قیام کے لیے 19 ارب 25 کروڑ روپے مالیت کے منصوبے منظور کر لیے گئے۔ وفاقی وزیر برائے منصوبہ بندی احسن اقبال کی زیر صدارت سینٹرل ڈویلپمنٹ ورکنگ پارٹی (سی ڈی ڈبلیو پی) کے اجلاس میں مجموعی طور پر تعلیم سے متعلق چھ منصوبوں کی منظوری دی گئی۔

اعلامیے کے مطابق دانش اسکولز قلعہ سیف اللہ، ژوب، موسیٰ خیل، ڈیرہ بگٹی اور دیگر پسماندہ اضلاع میں قائم کیے جائیں گے۔ ان منصوبوں کی لاگت وفاقی اور صوبائی حکومتیں مشترکہ طور پر برداشت کریں گی، جن میں ہر فریق 50 فیصد حصہ ادا کرے گا۔

وفاقی وزیر احسن اقبال کا کہنا تھا کہ ملک میں ڈھائی کروڑ بچے تاحال اسکولوں سے باہر ہیں، ایسے میں تعلیم کا فروغ اور خواندگی میں اضافہ قومی ضرورت ہے۔ ان کا کہنا تھا کہ دانش اسکولز پسماندہ علاقوں میں تعلیمی انقلاب کا پیش خیمہ ثابت ہوں گے۔

انہوں نے کہا کہ ان اسکولز میں جدید تدریسی سہولیات، لائبریری، کمپیوٹر لیب، لیبارٹریز، اور اساتذہ کے لیے رہائشی سہولیات فراہم کی جائیں گی تاکہ معیاری تعلیم کو فروغ دیا جا سکے۔

وفاقی حکومت کی جانب سے تعلیمی بجٹ میں اضافے اور عملی منصوبوں کی منظوری کو ماہرین تعلیم نے خوش آئند قرار دیا ہے، اور اسے پاکستان میں تعلیمی نظام کو بہتر بنانے کی جانب ایک مثبت قدم قرار دیا گیا ہے۔