پنجاب کی سینئر وزیر مریم اورنگزیب نے جناح انسٹیٹیوٹ آف کارڈیالوجی لاہور کے نام کی تبدیلی کی تردید کردی، انہوں نے واضح کردیا کہ نام تبدیل کرنے کی کوئی تجویز زیر غور نہیں اور اس حوالے سے زیرگردش خبروں کو مسترد کردیا۔

سماجی رابطے کی ویب سائٹ ایکس پر جاری بیان میں پنجاب کی سینئر وزیر مریم اورنگزیب نے کہا کہ ”جناح انسٹی ٹیوٹ آف کارڈیالوجی لاہور“ کا نام ”جناح انسٹی ٹیوٹ آف کارڈیالوجی لاہور“ ہی ہے اور کسی قسم کی تبدیلی زیر غور نہیں ہے۔

مریم اورنگزیب نے کہا کہ حکومت پنجاب کے مالی سال 26-2025 کے سالانہ ترقیاتی پروگرام میں فنڈنگ ”جناح انسٹی ٹیوٹ آف کارڈیالوجی“ کے نام سے ہی رکھی گئی ہے۔

سینئر صوبائی وزیر نے مزید کہا کہ امراض قلب اور دیگر بیماریوں کے عالمی معیار کے جدید علاج کے لیے 14 نئے اسپتال نواز شریف میڈیکل ڈسٹرکٹ میں قائم ہوں گے جس کی ماسٹر پلاننگ تکمیل کے قریب ہے۔

مریم اورنگزیب نے جناح انسٹی ٹیوٹ آف کارڈیالوجی کے نام کی تبدیلی سے متعلق زیرگردش خبروں کو مسترد کرتے ہوئے کہا کہ حقائق کی تصدیق کے بعد خبر دینے کی درخواست ہے۔