ڈسٹرکٹ اسپتال پاکپتن میں 20 نومولود بچوں کی اموات سے متعلق آج نیوز کی خبر پر ضلعی انتظامیہ نے ایکشن لے لیا۔ ڈپٹی کمشنر پاکپتن نے واقعے کی تحقیقات کے لیے قائم کی گئی 3 رکنی انکوائری کمیٹی کی رپورٹ کو تعصب زدہ قرار دیتے ہوئے مسترد کر دیا۔

ڈپٹی کمشنر نے رپورٹ پر تحفظات کا اظہار کرتے ہوئے کہا کہ کمیٹی کی فائنڈنگز جانبدارانہ ہیں اور شفافیت کے تقاضے پورے نہیں کرتیں۔ اس حوالے سے کمشنر ساہیوال کو خط لکھ کر ایک آزادانہ اور غیر جانب دار انکوائری کمیٹی کی تشکیل کی درخواست کر دی گئی ہے۔

پاکپتن ڈسٹرکٹ اسپتال میں ایک ہفتے میں 20 بچوں کی موت نے کئی سوال کھڑے کر دیے

واضح رہے کہ پاکپتن کے ڈسٹرکٹ اسپتال میں حالیہ دنوں میں مبینہ طور پر طبی سہولیات کی عدم دستیابی اور غفلت کے باعث 20 بچوں کی اموات ہوئی تھیں، جس پر میڈیا اور سول سوسائٹی کی جانب سے شدید ردعمل سامنے آیا تھا۔

آج نیوز کی خبر منظرعام پر آنے کے بعد واقعے کی ابتدائی تحقیقات کے لیے تین رکنی انکوائری کمیٹی تشکیل دی گئی تھی، جس کی رپورٹ کو اب مسترد کر دیا گیا ہے۔