ایران اور اسرائیل کے درمیان ہونے والی جنگ بندی بے اثر ثابت ہونے لگی، تازہ حملوں پر اسرائیل نے ایران کو جواب دینے کا اعلان کردیا ہے۔

میڈیا رپورٹس کے مطابق اسرائیلی فوج کا کہنا ہے کہ جنگ بندی کے اعلان کے بعد ایران نے حملے کیے، ایران نے اسرائیل پر بیلسٹک میزائل داغا۔

اسرائیلی وزیردفاع اسرائیل کاٹز نے ایران کیخلاف دوبارہ کارروائی کا اعلان کردیا ہے۔ اسرائیل کاٹز کا کہنا ہے کہ سیز فائرکی خلاف ورزی کا ایران کو جواب دیں گے۔

واضح رہے کہ امریکی صدر ڈونلڈ ٹرمپ کے ایران اسرائیل کے درمیان سیز فائر کے اعلان کے بعد ہی ایران نے اسرائیل پر بیلسٹک میزائل حملہ کیا جس کے نتیجے میں 5 اسرائیلی شہری ہلاک جبکہ متعدد زخمی ہوگئے۔

غیر ملکی میڈیا کے مطابق جنوبی اسرائیل کے شہر بیر شیوا میں منگل کی صبح ایرانی میزائل حملے میں 5 افراد ہلاک ہوئے، جب ایرانی میزائل نے اسرائیل میں ایک رہائشی عمارت کو نشانہ بنایا۔ یہ حملہ امریکی صدر ڈونلڈ ٹرمپ کی جانب سے جنگ بندی کے اعلان کے چند گھنٹوں بعد کیا گیا۔

اسرائیلی شہر بیر شیوا سے ایک ویڈیو منظرِ عام پر آئی ہے جس میں دکھایا گیا ہے کہ ایرانی میزائل کے حملے کے نتیجے میں رہائشی کمپلیکس مکمل طور پر تباہ ہوگیا ہے۔ ویڈیو میں عمارت کے باہر جلتی ہوئی گاڑیوں اور درختوں کے ملبے کو دیکھا جا سکتا ہے۔

اسرائیلی ایمرجنسی سروسز نے بتایا ہے کہ ایرانی میزائل حملے میں اب تک 5 افراد ہلاک اور کئی زخمی ہوئے ہیں۔

ایرانی سپریم لیڈر کس کی حفاظت میں ہیں؟ پاسداران انقلاب کو بھی ان محافظوں کا نہیں پتا

اسرائیلی ایمرجنسی سروس مگن ڈیوڈ ایڈوم (MDA) کے ایک بیان میں کہا گیا کہ جنوبی اسرائیل میں میزائل کے اثرات کے بعد، اب تک 5 افراد کی ہلاکت کی تصدیق ہو چکی ہے۔ دو افراد کو معتدل زخمی حالت میں اسپتال منتقل کر دیا گیا ہے، اور تقریباً 6 افراد کے معمولی زخمی ہونے پر ہی انہیں جائے وقوع پر طبی امداد فراہم کی گئی ہے۔

اسرائیل کا ایران پر حملہ

ایران کے حملے کے بعد اسرائیل نے بھی ایران کے شمالی صوبہ گیلان میں منگل کی صبح فضائی حملہ کیا جس میں کم از کم 9 افراد جاں بحق اور درجنوں زخمی ہو گئے۔ اسرائیل کے تازہ حملوں میں 13 بچے اور 44 خواتین شہید ہوئیں جس کی ایرانی حکام نے تصدیق کر دی۔

ایرانی حکام کے مطابق ان حملوں میں 163 عورتیں زخمی بھی ہوئی ہیں، اسرائیل نے حملوں میں ایرانی ایٹمی سائنسدان محمد رضا صدیقی کی شہادت کا دعوی بھی کیا ہے، تہران حکیمیہ، کرج اور رجائی شہر میں بھی دھماکے سنے گئے۔

تہران کی ایون جیل پر بھی بمباری سے کئی ہلاکتوں کی اطلاعات ہیں، تیرہ جون سے چوبیس جون تک بارہ روزہ جنگ کے دوران ایران کے اٹھارہ ایٹمی سائنسدان شہید ہوئے۔ ایرانی ریاستی میڈیا کے مطابق گیلان کے نائب گورنر نے اس بات کی تصدیق کی کہ حملہ صوبہ گیلان کے شمال مغربی علاقے میں رہائشی عمارتوں پر کیا گیا۔

تسنیم نیوز ایجنسی کے مطابق ایرانی حکام کا کہنا تھا کہ حملے کی شدت اتنی زیادہ تھی کہ ارد گرد کی دیگر رہائشی عمارتیں بھی متاثر ہوئیں اور وہاں کی انفراسٹرکچر کو بھی شدید نقصان پہنچا۔

حکام نے مزید بتایا کہ اسرائیلی حملے نے علاقے میں شدید تباہی مچائی ہے اور کئی گھروں کے ملبے تلے لوگ دبے ہوئے ہیں جنہیں نکالنے کے لیے امدادی کام جاری ہے۔ زخمیوں کو قریبی اسپتالوں میں منتقل کیا جا رہا ہے۔

خیال رہے اسرائیل اور ایران کے درمیان کشیدگی میں اس وقت مزید اضافہ ہوا جب 13 جون کو اسرائیل نے ایران کے جوہری اور فوجی مقامات پر پیشگی حملے کیے، جس کے بعد امریکہ کے صدر ڈونلڈ ٹرمپ نے خطے میں ”بڑی“ جنگ کے امکان کے بارے میں خبردار کیا تھا۔

اسرائیلی حملے میں ایک اور معروف ایرانی ایٹمی سائنسدان جاں بحق

یاد رہے کہ دونوں ممالک کے درمیان یہ شدید لڑائی گزشتہ 12 دنوں سے جاری ہے، جس میں دونوں جانب فضائی حملوں کا سلسلہ جاری ہے۔