خیبرپختونخوا کے مشیر اطلاعات بیرسٹر سیف کا کہنا ہے کہ صوبائی بجٹ بانی تحریک انصاف کی مشاورت کے بغیر کسی صورت منظور نہیں ہو سکتا۔ ان کا کہنا تھا کہ خیبرپختونخوا کے عوام نے بانی کے نظریے اور منشور کو ووٹ دیا ہے، اس لیے بجٹ بھی اسی سوچ کے تحت منظور کیا جائے گا۔

بیرسٹر سیف نے خبردار کیا کہ اگر خیبرپختونخوا میں ایمرجنسی نافذ کرنے کی کوشش کی گئی تو وفاقی حکومت ایک دن بھی چل نہیں پائے گی۔ ان کا کہنا تھا کہ عوام اپنے مینڈیٹ کی توہین کسی صورت برداشت نہیں کریں گے۔

وزیراعلیٰ خیبرپختونخوا کی اسمبلی تحلیل کرنے کی دھمکی

انہوں نے مزید کہا کہ اسمبلی تحلیل کرنے کا اختیار صرف وزیراعلیٰ کو حاصل ہے، اور وزیراعلیٰ جب چاہیں اسمبلی تحلیل کر سکتے ہیں۔ ان کا دعویٰ تھا کہ خیبرپختونخوا میں حکومت فارم 45 کی بنیاد پر قائم ہے، جبکہ وفاقی اور دیگر صوبائی حکومتیں فارم 47 کے جعلی مینار پر کھڑی ہیں۔

بیرسٹر سیف کا کہنا تھا کہ ایسی حکومتوں کو گرانے کے لیے صرف ایک دھکا ہی کافی ہے۔ انہوں نے زور دے کر کہا کہ خیبرپختونخوا میں حقیقی عوامی نمائندوں کی حکومت ہے، اور صوبے کے فیصلے عوامی مینڈیٹ کے مطابق ہی کیے جائیں گے۔