وفاقی وزیر منصوبہ بندی احسن اقبال نے کہا ہے کہ وہ جہاز جن کے اوپر بھارت کو بڑا غرور تھا، ہماری فضائیہ نے زمین پر پٹخ دیے، ہم نے بتا دیا کہ جو پاکستان پر میلی نگاہ ڈالے گا، ہم اس کا گھر تک پیچھا کریں گے۔

نارووال میں تقریب سے خطاب کرتے ہوئے وفاقی وزیر احسن اقبال نے کہا کہ صبح شام پی ٹی آئی کا سوشل میڈیا ملک اور فوج کے خلاف پروپیگنڈے میں مصروف تھا۔

ان کا کہنا ہے کہ جتنی بہادرانہ اور دلیرانہ قیادت کا فیلڈ مارشل عاصم منیر نے مظاہرہ کیا، تاریخ میں نہیں دیکھا۔

احسن اقبال نے کہا کہ 2019 میں بھی پاکستان پر بھارت نے حملہ کیا تھا، اس وقت کے وزیرِ اعظم نے اسمبلی میں کہا کہ پھر میں کیا کروں؟ کیا میں ہندوستان پر حملہ کر دوں؟ آج آپ کے وزیرِ اعظم نے مسلح افواج کو یہ نہیں پوچھا کہ اب ہم کیا کریں۔

انہوں نے مزید کہا کہ وزیرِ اعظم شہباز شریف نے کہا کہ دشمن کو ایسا جواب دیں کہ اسے پتہ لگ جائے، بتائیں کہ جو پاکستان کے ساتھ چھیڑ چھاڑ کرے گا پاکستان اس کے چہرے پر زناٹے دار تھپڑ مارنے کی صلاحیت رکھتا ہے۔

وفاقی وزیر احسن اقبال نے یہ بھی کہا کہ چند گھنٹوں کی مختصر جنگ میں بھارت کا اصل چہرہ دنیا کے سامنے بے نقاب ہوگیا، ہمارے شاہینوں نے بھارت کے 6 جہاز گرا کر مودی کا غرور خاک میں ملا دیا، جوں جوں بھارت ہوش میں آرہا ہے بتارہا ہے کہ ہاں پاکستان نے ہمارے جہاز مارے ہیں۔

انہوں نے کہا کہ پاکستانی شاہینوں نے وہ جہاز گرائے جو دشمن اپنی طاقت کی علامت سمجھتا تھا، اور کوئی گرانے کا سوچ بھی نہیں سکتا تھا، اللہ تعالیٰ نے پاکستان کو جنگ میں عظیم کامیابی عطا کی اور یہ کامیابی ہمارے جوانوں کی بہادری پیشہ ورانہ مہارت اور قومی یکجہتی کا نتیجہ ہے۔

انہوں نے سوشل میڈیا پر پھیلائی جانے والی معلومات پر تنقید کرتے ہوئے کہا کہ سوشل میڈیا اور حقیقت کی دنیا میں بہت فرق ہوتا ہے۔ انہوں نے عوام سے اپیل کی کہ وہ سوشل میڈیا کے پراپیگنڈے سے متاثر نہ ہوں بلکہ اصل حقائق اور قومی مفادات کو مدنظر رکھیں۔