شہر قائد آج شدید گرمی کی لپیٹ میں رہے گا، جب کہ دن بھر موسم گرم اور مرطوب رہنے کی پیش گوئی کی گئی ہے۔ محکمہ موسمیات کے مطابق کراچی میں آج زیادہ سے زیادہ درجہ حرارت 36 ڈگری سینٹی گریڈ تک جا سکتا ہے، تاہم گرمی کی شدت 42 ڈگری سینٹی گریڈ سے زائد محسوس کی جائے گی۔

محکمہ موسمیات کے مطابق کراچی کا موجودہ درجہ حرارت 31 ڈگری سینٹی گریڈ ریکارڈ کیا گیا ہے، جب کہ محسوس کی جانے والی گرمی 37 ڈگری سینٹی گریڈ کے قریب ہے۔ شہر میں جنوب مغربی سمت سے 7 کلومیٹر فی گھنٹہ کی رفتار سے ہوائیں چل رہی ہیں، جب کہ ہوا میں نمی کا تناسب 78 فیصد تک ہے، جو گرمی کی شدت کو مزید بڑھا رہا ہے۔

ملک کے بیشتر شہروں میں ہیٹ ویوو جیسی صورتحال پیدا ہونے کا امکان ظاہر کیا جا رہا ہے تاہم محکمہ موسمیات کے مطابق کراچی میں فی الحال ہیٹ ویو کا خطرہ موجود نہیں ہے۔

ملک بھر میں 15 سے 20 مئی تک شدید گرمی کا امکان، ہیٹ ویو الرٹ جاری

محکمہ موسمیات نے خبردار کیا ہے کہ 20 مئی کے بعد کراچی میں درجہ حرارت میں مزید اضافے کا امکان ہے، جس کے باعث شہریوں کو احتیاط برتنے اور دھوپ سے بچنے کی ہدایت کی گئی ہے۔