پاکستان اور بھارت کے درمیان حالیہ سیز فائر کے اعلان کے بعد، ملک بھر کے مختلف شہروں میں پاک فوج کے ساتھ اظہار یکجہتی کے لیے ریلیاں نکالی گئیں۔

شہریوں نے پاک فوج زندہ باد کے نعرے لگائے، قومی پرچم تھامے، اور ڈھول کی تھاپ پر رقص کیا۔ لاہور، اسلام آباد، کوئٹہ، ملتان، بھلوال، وہاڑی، گمبٹ، ایبٹ آباد، اور دیگر شہروں میں عوام نے سڑکوں پر آ کر اپنی محبت اور حمایت کا اظہار کیا۔

ایس ایم تنویر کی آرمی چیف اور پاک فوج کو بھارتی جارحیت کا بھرپور جواب دینے پر مبارکباد

لاہور میں لبرٹی مارکیٹ کے تاجروں نے پاکستان کا پرچم تھامے سڑکوں پر مارچ کیا اور پاک فوج کے حق میں زوردار نعرے لگائے۔ شہریوں نے ڈھول کی تھاپ پر رقص کیا اور وطن سے محبت کا والہانہ اظہار کیا۔

کور ہیڈ کوارٹر کے باہر پُرجوش لاہوریوں نے ڈیوٹی پر تعینات فوجیوں پر گل پاشی کی اور ان کی قربانیوں کو زبردست خراجِ تحسین پیش کیا۔

اسلام آباد میں بھی تاجروں اور شہریوں نے پاک فوج کے ساتھ اظہارِ یکجہتی کے لیے ایک بڑی ریلی نکالی۔ شرکاء نے پاکستانی پرچم لہرائے اور امن قائم کرنے پر افواج پاکستان کا شکریہ ادا کیا۔ ریلی میں ایک بڑی تعداد نے شرکت کی، جو وطن کے دفاع پر مامور جوانوں کو خراجِ عقیدت پیش کرنے کے لیے جمع ہوئے تھے۔

اس کے علاوہ، مسیحی اور سکھ برادریوں نے بھی احتجاجی ریلیاں نکالیں اور بھارتی جارحیت کے خلاف آواز اٹھائی۔

حب، اٹک، بہاولنگر، لیاقت پور، نوشہروفیروز، اور پنوعاقل جیسے صنعتی اور چھوٹے شہروں میں بھی عوام نے پاک فوج کے ساتھ یکجہتی کا اظہار کیا۔

پاک فوج کے شانہ بشانہ ہیں، خون کے آخری قطرے تک بھارت کے خلاف کھڑے رہیں گے، سکھ رہنما

اس دوران، حکومتی اداروں اور سول سوسائٹی کی جانب سے بھی پاک فوج کے ساتھ اظہار یکجہتی کے لیے ریلیاں نکالی گئیں۔

کوئٹہ میں مسیحی برادری نے پاک فوج کے حق میں احتجاجی ریلی نکالی اور پریس کلب کے باہر مظاہرہ کیا۔

بھلوال میں عوام نے پاک فوج اور فضائیہ کے حق میں ریلی نکالی اور ”پاک فوج زندہ باد“ کے نعرے لگائے۔

وہاڑی میں سنی علماء کونسل کے زیر اہتمام ”استحکام پاکستان ریلی“ نکالی گئی، جس میں عسکری قیادت اور جوانوں کو دندان شکن جواب دینے پر خراجِ تحسین پیش کیا گیا۔

ملتان میں پاکستان کسان اتحاد کے تحت ”پاک فوج زندہ باد ریلی“ نکالی گئی۔

ننکانہ صاحب میں سکھ برادری نے بھارتی جارحیت کے خلاف احتجاجی ریلی نکالی۔

بہاولنگر میں سرکاری ملازمین اور شہریوں نے پاک افواج کے حق میں ریلی نکالی۔

لیاقت پور میں ننھے بچوں نے بھی پاک فوج کے ساتھ اظہار یکجہتی کے لیے سڑکوں پر مارچ کیا۔

شور کوٹ میں ٹی ایچ کیو ہسپتال کی انتظامیہ نے پاک فوج کے ساتھ اظہار یکجہتی کے لیے ریلی نکالی۔

سرگودھا میں صحافی برادری اور سول سوسائٹی نے ”پاک فوج زندہ باد ریلی“ نکالی اور فضا نعروں سے گونج اٹھی۔

گجرات میں عوام بھارتی جارحیت کا منہ توڑ جواب ملنے پر سڑکوں پر نکل آئے اور انڈین فوجی تنصیبات کی تباہی پر خوشی کا اظہار کیا۔

پنوعاقل میں مسلم اسٹوڈنٹس آرگنائزیشن نے ”انڈیا مردہ باد ریلی“ چونگھا اسٹاپ سے پریس کلب تک نکالی۔

علی پور کے شہریوں اور تاجر برادری نے پاک فوج کے ساتھ کھڑے ہونے کا عزم ظاہر کیا اور ریلی کا انعقاد کیا۔

میلسی کے علاقے اڈا ہری چند سے بھی پاک فوج سے یکجہتی کے لیے ریلی نکالی گئی۔

نوشہروفیروز میں شہریوں نے پاک فوج کی حمایت میں ریلی نکالی۔

گمبٹ میں پاکستان ایکس سروس مین سوسائٹی اور شہریوں نے پھول باغ سے پریس کلب تک یکجہتی ریلی نکالی۔

ایبٹ آباد میں وکلاء نے بھارتی جارحیت کے خلاف اور پاک فوج کے ساتھ یکجہتی کے لیے مظاہرہ کیا اور ریلی نکالی۔

یہ مظاہرے اور ریلیاں اس بات کا غماز ہیں کہ پاکستانی عوام پاک فوج کے ساتھ کھڑے ہیں اور ملک کی سالمیت اور دفاع کے لیے متحد ہیں۔