پاک بھارت کشیدگی کے تناظر میں پاکستان نے ملکی فضائی حدود تمام قسم کی پروازوں کے لیے عارضی طور پر بند کر دی ہے۔ پاکستان ایئرپورٹس اتھارٹی کی جانب سے نوٹم جاری کر دیا گیا ہے۔

پاکستان ایئرپورٹ اتھارٹی کی جانب سے جاری بیان میں کہا گیا ہے کہ تمام ایئرپورٹس پر فلائٹ آپریشن کل دن 12 بجے تک معطل رہے گا، اس سلسلے میں باضابطہ نوٹم بھی جاری کر دیا گیا ہے۔

یہ اقدام سیکیورٹی صورتِ حال اور قومی فضائی سلامتی کے تقاضوں کو مدِنظر رکھتے ہوئے کیا گیا ہے۔ ملکی اور غیر ملکی تمام ایئرلائنز کو صورتحال سے آگاہ کر دیا گیا ہے۔

اتھارٹی کے مطابق صورتحال پر مسلسل نظر رکھی جا رہی ہے اور پروازوں کی بحالی سے متعلق فیصلہ حالات کے مطابق کیا جائے گا۔

راولپنڈی اور لاہور میں زوردار دھماکوں اور فائرنگ کی اطلاعات، پاک فوج نے بھارتی ڈرون مار گرایا

پاکستان ایئرپورٹ اتھارٹی نے بیان میں مسافروں سے اپیل کی کہ وہ سفر سے قبل متعلقہ ایئرلائنز سے رابطہ کر کے تازہ ترین معلومات حاصل کریں۔

واضح رہے کہ پاک بھارت کشیدگی کے بعد یہ اقدام ایک احتیاطی تدبیر کے طور پر اٹھایا گیا ہے تاکہ کسی بھی ہنگامی یا خطرناک صورتحال سے مؤثر انداز میں نمٹا جا سکے۔