مچھ جیل قیدیوں کی منتقلی کے دوران اغوا کیے گئے پانچ پولیس اہلکار تاحال بازیاب نہ ہو سکے۔ مغوی اہلکاروں کا تعلق لسبیلہ اور حب سے ہے۔

اہلکاروں کے اہل خانہ نے حکومت اور اعلیٰ حکام سے فوری اقدامات کی اپیل کرتے ہوئے کہا ہے کہ ان کے بچے اپنے والد کی واپسی کے منتظر ہیں۔ ورثا نے جذباتی انداز میں اپیل کرتے ہوئے کہا کہ ہمارے گھر کے کفیل لاپتا ہیں، اُن کی زندگیوں کا سوال ہے۔

متاثرہ خاندانوں نے تمام بلوچ رہنماؤں اور قبائلی عمائدین سے بھی مطالبہ کیا ہے کہ وہ انسانی ہمدردی کی بنیاد پر اس معاملے میں مداخلت کریں اور ان کے پیاروں کی رہائی میں کردار ادا کریں۔

تاحال مغوی اہلکاروں کے بارے میں کوئی مصدقہ اطلاع سامنے نہیں آ سکی۔ متاثرہ خاندان شدید اضطراب اور کرب کی کیفیت میں مبتلا ہیں، اور ہر گزرتے لمحے کے ساتھ ان کی بے چینی میں اضافہ ہو رہا ہے۔