اٹلی کی سفیر مریلینا ارمیلین نے کراچی میں بزنس ریکارڈر گروپ کا دورہ کیا، آج نیوز کو دیئے گئے خصوصی انٹرویو میں کہا کہ پاکستان کو جدید مشینری اور ٹیکنالوجی برآمد کر رہے ہیں، پاکستان کے ساتھ دوطرفہ تجارت میں مزید اضافہ چاہتے ہیں۔

اٹلی کی سفیر مریلینا ارمیلین نے کراچی میں بزنس ریکارڈر گروپ کا دورہ کیا۔ دورے کے دوران انہوں نے آج نیوز کے چیف آپریشنل آفیسر شہاب زبیری سے ملاقات کی، جس میں دونوں ملکوں کے درمیان باہمی تعلقات اور تجارتی مواقع پر تبادلہ خیال کیا گیا۔

چیف آپریشنل آفیسرشہاب زبیری نے اٹلی کی سفیر کو خوش آمدید کہا اور ملاقات کے دوران انہیں آج نیوز کی یادگاری شیلڈ دی اور سندھ کی روایتی ثقافتی اجرک بھی پہنائی۔ اس موقع پر ڈائریکٹر نیوز معصوم رضوی نے سفیر مریلینا ارمیلین کو گلدستہ پیش کیا۔

اٹلی کی سفیر مریلینا ارمیلین نے نیوز روم اور اسٹوڈیو کا بھی دورہ کیا، اس موقع پر آج نیوز سے گفتگو میں کہا کہ پاکستان کو جدید مشینری اور ٹیکنالوجی برآمد کر رہے ہیں، پاکستان کے ساتھ دوطرفہ تجارت میں مزید اضافہ چاہتے ہیں۔

انھوں نے آج نیوز سے خصوصی گفتگو میں کہا کہ پاکستانی سرمایہ کار اٹلی میں تجارتی مواقع سے فائدہ اٹھائیں۔ انھوں نے اٹلی اور پاکستان کے درمیان تجارتی تعلقات کو مزید مستحکم کرنے کے لیے دلچسپی ظاہر کی۔

سفیر مریلینا ارمیلین نے بزنس ریکارڈر گروپ کی جانب سے شاندار خیرمقدم پر ان کا شکریہ بھی ادا کیا۔ اس موقع پر اٹلی کے قونصل جنرل بھی ان کے ہمراہ تھے۔