لاہور ہائی کورٹ نے ادویات کی عدم دستیابی سے متعلق درخواست کی سماعت کے دوران کہا کہ ہیلتھ کمیشن کیئر کی وزیراعلی سے میٹینگ ہونی چاہیے، پھر روزانہ اسپتالوں کے دورے کی ضرورت پیش نہیں آئے گی۔

لاہور ہائیکورٹ نے سرکاری اسپتالوں میں ادویات کی عدم دستیابی کے خلاف درخواست پر سماعت کی۔ عدالت نے ہیلتھ کمیشن کیئر کو ہدایت دی کہ لیب ٹیسٹوں کی فیسوں کو مقرر کرکے آئندہ رپورٹ پیش کی جائے۔

سماعت کے دوران عدالت نے مزید کہا کہ ہیلتھ کمیشن کیئر کی وزیر اعلیٰ کے ساتھ میٹنگ ہونی چاہیے، تاکہ اسپتالوں کے دوروں کی ضرورت پیش نہ آئے۔

وکیل اظہر صدیق نے عدالت کو بتایا کہ ادویات کی فراہمی کے لیے اسپتالوں کو بجٹ نہیں دیا جارہا ہے، جس پر عدالت نے کہا کہ وہ ادویات کی فراہمی کے لیے بجٹ ریلیز نہیں کروا سکتی۔

چیف ایگزیکٹو ہیلتھ کمیشن کیئرعدالت کے روبرو پیش ہوئے عدالت کو بتایا کہ سروسز اسپتال اور دیگر سرکاری اسپتالوں کی رپورٹ تیار ہے۔

جسٹس شاہد کریم نے جوڈیشل ایکٹوزم پینل کی درخواست پر سماعت کی، جس میں درخواست گزار کی جانب سے اظہر صدیق ایڈووکیٹ پیش ہوئے۔

لاہور ہائی کورٹ نے سماعت کو 10 اپریل تک ملتوی کردی۔

مخصوص سیٹوں کے سپریم کورٹ کے فیصلے پر عملدرآمد کروانے کی درخواست پر سماعت

لاہور ہائیکورٹ میں مخصوص سیٹوں کے سپریم کورٹ کے فیصلے پر عملدرآمد کروانے کی درخواست پر بھی سماعت ہوئی۔

سماعت کے دوران پنجاب حکومت کے وکیل نے درخواست پر سماعت ملتوی کرنے کی استدعا کردی جس کے بعد عدالت نے استدعا منظور کرتے ہوئے سماعت 7 اپریل تک ملتوی کردی۔

سماعت کے دوران وکیل درخواست گزار نے مؤقف اپنایا کہ 7 سے8 ماہ ہوچکے ہیں، ابھی تک عدالت کے فیصلے پر عملدرآمد نہیں ہوا۔

وکیل اظہر صدیق نے کہا کہ مخصوص سیٹوں پر پی ٹی آئی کا حق ہے، اس پرجسٹس خالد اسحاق نے کہا اس کیس کو عید کے فوری بعد سماعت کے لیے مقررکیا جائے۔