بھارتی تنظیم ایسوسی ایشن فار ڈیموکریٹک ریفارمز (ADR) کی تازہ ترین رپورٹ کے مطابق، حکومتی جماعت بی جے پی کے پراگ شاہ، جو ممبئی کے گھاٹ کوپر ایسٹ سے ایم ایل اے (رکن قومی اسمبلی) ہیں، 3,400 کروڑ روپے کے اثاثوں کے ساتھ بھارت کے سب سے امیر ایم ایل اے قرار دیے گئے ہیں۔ ان کے بعد کانگریس کے ڈی کے شیوکمار ہیں، جو کرناٹک کے کاناکاپورا سے ایم ایل اے ہیں، جن کی دولت 1,413 کروڑ روپے سے تجاوز کر چکی ہے۔

یہ رپورٹ ایم ایل ایز کے ذریعہ اپنے حالیہ انتخابات میں جمع کرائے گئے حلف ناموں کے تجزیے پر مبنی ہے۔ اس میں 28 ریاستی اسمبلیوں اور تین یونین ٹیریٹریز کے 4,092 ایم ایل ایز کا ڈیٹا شامل کیا گیا، جبکہ 24 ایم ایل ایز کے غیر واضح حلف نامے اور سات خالی نشستیں شامل نہیں کی گئیں۔

سب سے کم اثاثے رکھنے والے ایم ایل اے

ویسٹ بنگال کے انڈس سے بی جے پی کے ایم ایل اے نرمل کمار دھارا فہرست میں سب سے نیچے ہیں، جن کے اثاثے صرف 1,700 روپے کے ہیں۔

امیر ترین ایم ایل ایز کی فہرست میں دیگر نمایاں شخصیات

• این چندرابابو نائیڈو، وزیراعلیٰ آندھرا پردیش: 931 کروڑ روپے
• وائی ایس جگن موہن ریڈی، سابق وزیراعلیٰ آندھرا پردیش: 757 کروڑ روپے
• کے ایچ پُتّا سوامی گوڑا، آزاد ایم ایل اے، کرناٹک: 1,267 کروڑ روپے
• پریہ کرشنا، کانگریس ایم ایل اے، کرناٹک: 1,156 کروڑ روپے
• پی نارائنا، ٹی ڈی پی ایم ایل اے، آندھرا پردیش: 824 کروڑ روپے
• وی پرشانتی ریڈی، ٹی ڈی پی ایم ایل اے، آندھرا پردیش: 716 کروڑ روپے

آندھرا پردیش کے ایم ایل ایز کی نمایاں موجودگی

آندھرا پردیش کے چار ایم ایل ایز بھارت کے دس امیر ترین قانون سازوں کی فہرست میں شامل ہیں، جبکہ سات ایم ایل ایز ٹاپ 20 کی فہرست میں آتے ہیں، جن میں آئی ٹی وزیر نارا لوکیش اور ہندُوپور کے ایم ایل اے این بالکرشنا شامل ہیں۔

ریاستوں کے لحاظ سے ایم ایل ایز کے مجموعی اثاثے

کرناٹک کے 223 ایم ایل ایز کے مشترکہ اثاثے 14,179 کروڑ روپے ہیں، جو ملک میں سب سے زیادہ ہیں۔

مہاراشٹر کے 286 ایم ایل ایز کے اثاثے 12,424 کروڑ روپے تک پہنچ چکے ہیں۔ جبکہ آندھرا پردیش کے 174 ایم ایل ایز کی مجموعی دولت 11,323 کروڑ روپے ہے۔

کم ترین مجموعی دولت رکھنے والی اسمبلیاں

• تریپورہ کے 60 ایم ایل ایز: 90 کروڑ روپے
• منی پور کے 59 ایم ایل ایز: 222 کروڑ روپے
• پدوچیری کے 30 ایم ایل ایز: 297 کروڑ روپے

فی ایم ایل اے اوسط اثاثے

• آندھرا پردیش: 65.07 کروڑ روپے
• کرناٹک: 63.58 کروڑ روپے
• مہاراشٹر: 43.44 کروڑ روپے

کم ترین اوسط اثاثے رکھنے والی ریاستیں

• تریپورہ: 1.51 کروڑ روپے
• ویسٹ بنگال: 2.80 کروڑ روپے
• کیرالہ: 3.13 کروڑ روپے

بھارتی ایم ایل ایز کی مجموعی دولت

بھارت کے 4,092 موجودہ ایم ایل ایز کی کل دولت 73,348 کروڑ روپے ہے، جو ناگالینڈ (23,086 کروڑ روپے)، تریپورہ (26,892 کروڑ روپے)، اور میگھالیہ (22,022 کروڑ روپے) کے 2023-24 کے سالانہ بجٹ سے زیادہ ہے۔

سیاسی جماعتوں کے لحاظ سے ایم ایل ایز کے اثاثے

بی جے پی کے 1,653 ایم ایل ایز کے اثاثے 26,270 کروڑ روپے ہیں، جو سکم، ناگالینڈ اور میگھالیہ کے سالانہ بجٹ سے زیادہ ہیں۔

کانگریس کے 646 ایم ایل ایز کے اثاثے 17,357 کروڑ روپے ہیں۔

ٹی ڈی پی کے 134 ایم ایل ایز کے اثاثے 9,108 کروڑ روپے ہیں۔

شیو سینا کے 59 ایم ایل ایز کے اثاثے 1,758 کروڑ روپے ہیں۔

عام آدمی پارٹی کے 123 ایم ایل ایز کے پاس اوسطاً 7.33 کروڑ روپے فی ایم ایل اے کے حساب سے دولت موجود ہے۔