امریکا سے تعلق رکھنے والے 22 سالہ ایڈن کرافٹ نامی نوجوان موت کو چھو کر واپس آئے، حال ہی میں انہوں نے برفانی تودے کی زد میں آنے کے بعد 90 منٹ تک برف میں دفن رہنے کی ہولناک داستان شئیر کی۔

غیر ملکی میڈیا رپورٹس کے مطابق گزشتہ ماہ 20 فروری کو ایڈن کرافٹ اپنے دوستوں اور اہل خانہ کے ہمراہ کولوراڈو کے ہانس چوٹی پر سنو موبلنگ کر رہے تھے کہ اچانک اُن پر برفانی تودہ آگرا۔

ایڈن کرافٹ نے بتایا کہ ان کے گروپ کے چند لوگ پہاڑ کی چوٹی تک پہنچنے کے لیے پہاڑیوں کی ایک سیریز پر جاتے ہوئے پھنس گئے، جس کے بعد انہوں نے ان کے لیے چوٹی تک پہنچنے کے لیے سب سے آسان راستہ تلاش کیا۔

امریکی نوجوان نے مزید بتایا کہ وہ اپنی سنو موبائل پر سوار ہوکر تقریباً 10 ہزار فٹ کی بلندی پر پہنچے تو انہیں خیال آیا کہ شاید انہیں چوٹی پر خود نہیں جانا چاہیے جس کے بعد انہوں نے دوبارہ پہاڑی سے نیچے جانے کا فیصلہ کیا لیکن اسی دوران برفانی تودہ ان پر آگرا جس میں وہ دفن ہوگئے۔

بھارت میں فوجی تعمیراتی کمپنی پر قیامت ٹوٹ پڑی، 57 افراد برف میں زندہ درگور

برفانی تودے کا شکار بننے والے ایڈن نے بتایا کہ برفانی تودہ گرنے کے بعد ان کی پہلی ترجیح اپنے ہیم ریڈیو کو تلاش کرنا تھی جس میں انہیں 10 منٹ لگے اور خوش قسمتی سے وہ اپنے گروپ کو کال کرنے میں کامیاب رہے

ایڈن نے فوری طور ان سے مدد مانگتے ہوئے صورت حال سے آگاہ کیا، پھر انہوں نے اپنے جسم کو حرکت دینے کیلئے برف کو اپنی ٹانگوں سے ہٹانا شروع کیا اور 80 منٹ بعد ریسکیو ٹیم نے ان کی زندگی بچائی۔