شادی بیاہ کی تقریبات خوشیوں، رنگوں اور مسکراہٹوں سے بھرپور ہوتی ہیں، مگربعض اوقات ان میں غیر متوقع مہمان بھی آ دھمکتے ہیں۔ ایسا ہی کچھ ایک ہلدی کی تقریب میں ہوا، جہاں ایک ننھا شرارتی مہمان اچانک نمودار ہوا اور سب کو حیرت میں ڈال دیا۔

انڈین کلچر میں شادی کی تقریبات میں مہندی کی رسم اور ہلدی کی رسم کا رواج ہے یہ واقعہ ایک وائرل ویڈیو کا ہے، جہاں دولہا دلہن پر ہلدی لگائی جا رہی تھی، مہمان خوشی میں جھوم رہے تھے، اور موسیقی کی گونج میں قہقہے بکھر رہے تھے اور ایک مہمان ہاتھ میں لڈوؤں کی پلیٹ لیے کھڑا تھا کہ اچانک ایک بندر تقریب میں گھس آیا۔ یہ بندر کسی چور کی طرح دبے پاؤں آیا اورسیدھا لڈوؤں کی طرف لپکا، اور اس سے پہلے کہ کوئی کچھ سمجھ پاتا، دونوں ہاتھوں میں لڈو بھر کر اور ایک منہ میں دبا کر بجلی کی تیزی سے بھاگ نکلا۔ مہمان حیرت اور خوف سے اچھل پڑے، مگر جب بندر منظر سے غائب ہوا تو ہنسی سے لوٹ پوٹ ہوگئے۔

کسی نے مذاق میں کہا، ’بھائی موقع دیکھ کر چوکا مار گیا۔‘

یہ ویڈیو وائرل ہوتے ہی سوشل میڈیا صارفین بھی اس دلچسپ واردات پر تبصرے کرنے لگے۔ کسی نے کہا،

’دانے دانے پر لکھا ہے کھانے والے کا نام، یہ لڈو بندر کی قسمت میں تھے۔‘ تو کوئی بولا،’بندر سوچ رہا ہوگا کہ اکیلا نہیں کھاؤں گا، سب کے لئے لے جاؤں گا۔‘

ایک صارف نے مزاحیہ انداز میں لکھا، ’چارلس ڈارون کا نظریہ ارتقا صحیح تھا، ہم نے اپنے آبا و اجداد سے موقع پرستی کے گر سیکھے ہیں۔‘

بندر بھی انسانوں کی طرح بول سکتے ہیں، تحقیق میں ثبوت سامنے آگئے

یہ واقعہ ایک یادگار لمحہ بن گیا، جہاں بندر نے نہ صرف مہمانوں کی توجہ اپنی طرف مبذول کرائی بلکہ ہلدی کی تقریب میں ایک رنگ بھر دیا۔