خیبر پختونخوا کے صوبائی وزیر برائے اعلیٰ تعلیم مینا خان آفریدی نے کہا ہے کہ صوبے کی یونیورسٹیوں میں وائس چانسلرز کی تعیناتی کا عمل آخری مراحل میں ہے اور ایک مہینے کے اندر تمام یونیورسٹیوں کو مستقل وائس چانسلرز مل جائیں گے۔

مینا خان آفریدی نے آج نیوز سے خصوصی گفتگو میں کہا کہ یونیورسٹیوں کے مالی بحران پر قابو پانے کے لیے ایک جامع معاشی پلان تیار کیا گیا ہے، جس پر عمل درآمد کے بعد آئندہ مالی سال تک یونیورسٹیوں کی مالی مشکلات ختم ہو جائیں گی۔

کابینہ میں رد و بدل سے متعلق سوال پر مینا خان آفریدی نے کہا کہ اس کا فیصلہ بانی چیئرمین کریں گے، وہ جس کو چاہیں، کوئی بھی ذمہ داری دے سکتے ہیں۔

صوبائی وزیر نے وزیر صحت کی کارکردگی کو سراہتے ہوئے کہا کہ ان کے خیال میں وزیر صحت اچھا کام کر رہے ہیں اور صحت کے شعبے میں مثبت اقدامات کیے جا رہے ہیں۔