دنیا کے امیر ترین افراد میں شمار ہونے والے ایلون مسک، جو ٹیسلا، اسپیس ایکس اور سوشل میڈیا پلیٹ فارم ”ایکس“ (سابقہ ٹوئٹر) کے مالک ہیں، کو برطانیہ کی معروف سائنسی تنظیم ”رائل سوسائٹی“ سے نکالے جانے کا سامنا ہے۔

رائل سوسائٹی کیا ہے؟

یہ سوسائٹی 1660 میں قائم کی گئی تھی اور اسے دنیا کی سب سے پرانی سائنسی تنظیم کہا جاتا ہے۔ اس کے ممبران میں سرآئزک نیوٹن، چارلس ڈارون، البرٹ آئن سٹائن اور اسٹیفن ہاکنگ جیسے عظیم سائنسدان شامل رہے ہیں۔

ایلون مسک کو 2018 میں ان کی الیکٹرک گاڑیوں اور خلائی تحقیق میں شاندار خدمات کے اعتراف میں اس تنظیم کا رکن (فیلو) بنایا گیا تھا۔ اس وقت انہیں ’اکیسویں صدی کا ازامبارڈ برونیل‘ کہا گیا تھا، جو کہ برطانیہ کے مشہور انجینئر تھے۔

اختلاف یا مسئلہ کیا ہے؟

گزشتہ کچھ عرصے سے کئی سائنسدان ایلون مسک کے خیالات اور بیانات پر اعتراض کر رہے ہیں۔ ان پر الزام ہے کہ وہ سائنسی تحقیق کو نقصان پہنچا رہے ہیں، غلط معلومات پھیلا رہے ہیں اور بعض معروف سائنسدانوں پر بےبنیاد الزامات لگا رہے ہیں۔

ایلون مسک کا اسپیس ایکس اسٹار شپ راکٹ فضا میں دھماکے سے پھٹ گیا، ویڈیو وائرل

ایک کھلے خط میں، جس پر دنیا بھر کے 2300 سے زائد سائنسدانوں نے دستخط کیے ہیں، مسک پر سائنس کے خلاف حملہ کرنے کا الزام لگایا گیا ہے۔ خاص طور پر ان کی ڈونلڈ ٹرمپ کی حمایت اور ماحولیاتی تبدیلی (کلائمیٹ چینج) کو کم اہم ظاہر کرنے پر شدید تنقید کی جا رہی ہے۔

رائل سوسائٹی کا ردعمل

رائل سوسائٹی نے اس معاملے پر غور کرنے کے لیے اپنے 1800 اراکین کی میٹنگ بلائی ہے۔ اس میٹنگ میں یہ فیصلہ کیا جائے گا کہ کیا ایلون مسک کو تنظیم سے نکال دیا جائے یا نہیں۔

دلچسپ بات یہ ہے کہ پچھلے 150 سال میں کسی بھی رکن کو رائل سوسائٹی سے نہیں نکالا گیا۔ اس سے پہلے، ڈی این اے کی دریافت کرنے والے جیمز واٹسن پر نسل پرستی اور خواتین مخالف بیانات دینے کے الزامات لگے، مگر وہ آج بھی رائل سوسائٹی کے رکن ہیں۔

ایلون مسک نے ہالی ووڈ ریپر کانیے ویسٹ کا ایکس اکاؤنٹ کیوں اُڑایا؟

رائل سوسائٹی کے کچھ اراکین کا کہنا ہے کہ مسک کے نظریات قابل اعتراض ہیں، مگر ان کی سائنسی خدمات بےمثال ہیں۔ ایک رکن نے کہا،

’میں مسک کے کچھ خیالات سے اتفاق نہیں کرتا، لیکن انہیں تنظیم سے نکالنا منافقت ہوگی، کیونکہ وہ انجینئرنگ میں عظیم کامیابیاں حاصل کر چکے ہیں۔‘

کیا ایلون مسک کو نکالا جائے گا؟

اس وقت کچھ کہنا قبل از وقت ہوگا، مگر یہ معاملہ سائنسی دنیا میں ایک بڑا تنازعہ بن چکا ہے۔ اگر مسک کو بےدخل کر دیا گیا، تو یہ ڈیڑھ صدی میں پہلا موقع ہوگا جب کسی بڑے سائنسدان کو رائل سوسائٹی سے نکالا جائے گا۔ دوسری طرف، اگر انہیں برقرار رکھا گیا، تو یہ بحث جاری رہے گی کہ سائنسی خدمات اور ذاتی نظریات کو الگ الگ رکھنا چاہیے یا نہیں۔

یہ دیکھنا باقی ہے کہ اگلے ماہ ہونے والی میٹنگ میں کیا فیصلہ کیا جاتا ہے، لیکن یہ تنازعہ سائنس اور سوشل میڈیا کے اثرات پر ایک اہم بحث کو جنم دے چکا ہے