پاکستان تحریک انصاف (پی ٹی آئی) کے رہنما شہریار آفریدی نے کہا ہے کہ شیر افضل مروت مشکل وقت میں مضبوط کھڑے رہے، انہیں ہٹانے کا علم پارٹی چئیرمین بیرسٹر گوہر علی خان کو بھی نہیں، ہم عمران خان سے معلوم کریں گے، پھر پتا چل جائے گا۔

شہریار آفریدی نے پشاور ہائیکورٹ میں میڈیا سے گفتگو کرتے ہوئے کہا کہ ہم اور ہمارے بانی عمران خان آئین کی بالا دستی چاہتے ہیں، پختونخوا میں ضم کیے گئے اضلاع کے ساتھ ریاست نے وعدے پورے نہیں کیے۔

انہوں نے کہا کہ کوہاٹ کی 20 ارب روپے سے زائد رائلٹی کو روکا گیا ہے، پنجاب میں پی ٹی آئی ورکرز اور ٹکٹ ہولڈرز سے بدترین سلوک کیا جا رہا ہے، جیلوں میں پی ٹی آئی کے سیاسی قیدیوں سے غیر مناسب سلوک کا سلسلہ جاری ہے، جتنے یہ ظلم کرتے جائیں، بانی کے پیرو کاروں میں اضافہ ہو رہا ہے۔

پارٹی سے نکالے جانے پر شیر افضل کا جواب

شیر افضل مروت کو پارٹی سے نکالے جانے پر شہریار آفریدی کا کہنا تھا شیر افضل کی پارٹی کیلئے خدمات ہیں، شیر افضل مروت کیلئے بانی چیئرمین سے بات کریں گے، کل میرے سامنے بانی پی ٹی آئی نے شیر افضل مروت کو ہٹانے کی کوئی بات نہیں کی۔

انہوں نے کہا کہ شیر افضل مروت مشکل وقت میں مضبوط کھڑے رہے ہیں، عمران خان رحم دل انسان ہیں، شیر افضل مروت کے حوالے سے جلد بات کرلی جائے گی، ہم سب پارٹی کے کوڈ آف کنڈکٹ کے پابند ہیں، عمران خان اور ہم سب قانون کی بالا دستی کے لیے کھڑے ہیں۔

جے یو آئی سے اپنا سیاسی کریئر شروع کرنے والے شیر افضل مروت نے پی ٹی آئی میں جگہ کیسے بنائی؟

سابق وزیر مملکت کا کہنا تھا کہ افغانستان ہمارا برادر اسلامی ملک ہے، ایسا وطیرہ اپنانا زیب نہیں دیتا، جو رویہ افغانستان کے ساتھ روا رکھا گیا ہے ، یہ درست نہیں۔

انہوں نے کہا کہ پاکستان میں پلے بڑھے افغانی پاکستان کے وفادار ہیں، پاکستان سے محبت کرتے ہیں، مذاکرات ایسے معاملات میں نہیں ہوتے، جہاں بد ترین فسطایت ہو، بانی نے مذاکرات کے لیے مطالبات پیش کیے جن پر کوئی عمل نہیں ہوا۔