بھارت کے شہرکولکتہ میں گزشتہ سال 31 سالہ ٹرینی ڈاکٹر کے ساتھ زیادتی اور وحشیانہ قتل کے الزام میں گرفتار ملزم کو عدالت نے عمر قید کی سزا سنا دی۔

بھارتی میڈیا کے مطابق عدالتی فیصلے میں کہا گیا کہ پیش کیے گئے ثبوتوں سے سنجے رائے پر الزام ثابت ہوتا ہے، عدالت نے سنجے کو سزائے موت دینے کی سی بی آئی کی استدعا مسترد کرتے ہوئے عمر قید کا حکم دیا۔

بھارتی میڈیا کے مطابق مجرم نے عدالت میں جرم سے انکار کرتے ہوئےکہا کہ وہ بےگناہ ہے اور اسے مقدمے میں پھنسایا گیا ہے جب کہ سی بی آئی نے اس سے کچھ دستاویزات پر زبردستی دستخط بھی کرائے ہیں۔

بھارت : پولیس اہلکار سنجے رائے خاتون ڈاکٹر کی عصمت دری اور قتل میں مجرم قرار

مقتولہ ڈاکٹر کی والدہ نے عدالتی فیصلے پر ردعمل دیتے ہوئےکہا کہ مجرم اکیلا نہیں تھا بلکہ اس کے ساتھ اور لوگ بھی تھے، ہمیں انتظار ہے کہ باقی لوگ بھی گرفتار ہوں گے اور انہیں بھی سزا ملےگی۔

مقتولہ کی والدہ کا کہنا تھا کہ سنجے کو بائیولوجیکل ثبوتوں کی بنیاد پر سزا سنائی گئی ہے اور دوران سماعت وہ خاموش ہی رہا جو ظاہر کرتا ہےکہ وہ اس جرم میں ملوث ہے تاہم وہ اکیلا نہیں تھا، اس لیے انصاف ابھی مکمل نہیں ہوا، ہم اس کے لیے مزید لڑائی جاری رکھیں گے۔

کلکتہ ریپ کیس کے مرکزی ملزم کی جیل میں لذیذ کھانے کی فرمائش

واضح رہے کہ 31 سالہ ٹرینی ڈاکٹر کی لاش 9 اگست 2024 کو کلکتہ کے سرکاری میڈیکل کالج کی کلاس سے ملی تھی، پوسٹ مارٹم میں خاتون سے زیادتی کی تصدیق ہوئی تھی۔

خاتون ٹرینی ڈاکٹر سے زیادتی اور قتل کے واقعے کے خلاف بھارت میں شدید احتجاج کیا گیا تھا اور پورے ملک میں ڈاکٹر سڑکوں پر آگئے تھے جب کہ واقعےکے اگلے روز سنجےرائےکو گرفتار کرلیا گیا تھا۔