اسرائیلی میڈیا نے دعویٰ کیا ہے کہ اسرائیل اور حزب اللہ جنگ بندی پر ابتدائی طور پر رضامند ہو گئے ہیں جس کے تحت حزب اللہ دریائے لیطانی سے شمال تک پیچھے ہٹ جائے گا جبکہ اسرائیل جنوبی لبنان سے انخلا کرے گا۔

اسرائیلی میڈیا کی رپورٹ کے مطابق جنگ بندی کی نگرانی امریکا کی نگران فورس کرے گی بعدازاں لبنان اور اسرائیل کے درمیان سرحدی حدبندی پر مذاکرات ہوں گے۔

اس حوالے سے تجزیہ کاروں کا کہنا ہے کہ معاہدے کی موجودہ تفصیلات اسرائیل کے حق میں ہیں۔

دوسری جانب سرائیلی فوج کے غزہ میں حملے جاری ہیں۔ مزید پینتیس فلسطینی شہید ہوگئے جبکہ چورانوے زخمی ہوگئے۔ بریج کیمپ پر حملے میں چار افراد شہید ہوئے ہیں۔ کمال عدوان اسپتال پر مسلسل ایک ہفتے سے فضائی حملے اور ٹینکوں سے گولہ باری جاری ہے۔

تازہ ڈرون حملے میں اسپتال ڈائریکٹر سمیت طبی عملے کے مزید بارہ افراد زخمی ہوگئے، اسپتال ڈائریکٹر نے عالمی برادری کے نام کھلا خط لکھ دیا۔

انہوں نے خط میں کہا کہ شمالی غزہ میں نسل کشی کی مہم چلائی جارہی ہے۔ غزہ میں شہدا کی مجموعی تعداد چوالیس ہزار دو سو گیارہ ہوگئی۔ فلسطینی اخبار القُدس کے مطابق حماس نے رفح میں اسرائیلی ٹینکوں پر راکٹ حملے کردیے، دس اسرائیلی فوجی ہلاک اور چھ ٹینک تباہ ہوگئے۔