دنیا کی مصروف ترین سمجھی جانے والی چینی بندرگاہ پر ایک کنٹینر شپ میں بڑا دھماکا ہوا ہے۔ تائیوان نے اس دھماکے کی تصدیق کی ہے۔ دھماکا اِتنا شدید تھا کہ بندرگاہ کا بنیادی ڈھانچا لرز کر رہ گیا۔

برطانوی نشریاتی ادارے کی رپورٹ کے مطابق چینی میڈیا نے بتایا ہے کہ شنگھائی کے جنوب میں واقع ننگبو ژوشان نامی بندرگاہ پر ہونے والا دھماکا اِتنا شدید تھا کہ ارتعاش ایک کلومیٹر دور تک محسوس کیا گیا۔ دھماکے کے وقت اس جہاز کے نزدیک سے لائبیریا کا پرچم بردار جہاز گزر رہا تھا۔ وہ جہاز محفوظ رہا۔

ریسکیو ورکرز نے بتایا ہے کہ اب تک کسی ہلاکت کی اطلاع نہیں ملی۔ امدادی کارروائیاں جاری ہیں۔ جہاز کے عملے کو بحفاظت نکال لیا گیا۔ جس جہاز میں دھماکا ہوا ہے وہ تائیوان کی کنٹینر شپنگ کمپنی یانگ مِنگ میرین ٹرانسپورٹ کی ملکیت تھا۔

ژیجیان پراونشل ایمرجنسی مینیجمنٹ ایڈمنسٹریشن نے بتایا ہے کہ جس جہاز پر دھماکا ہوا اُس پر خطرناک مواد لدا ہوا تھا تاہم مواد کی نوعیت کی صراحت نہیں کی گئی۔