کراچی کے علاقے گلشن اقبال سے رینجرز کا ریٹائرڈ اہلکار بھی پر اسرار طور پر لاپتا ہوگیا ہے۔ سندھ ہائیکورٹ نے سلطان محمود کی بازیابی کیلیے ہر ممکن اقدامات کرنے کا حکم دے دیا۔

سندھ ہائی کورٹ میں رینجرز کے ریٹائرڈ اہلکار کی اہلیہ نے دہائیاں دیں کہ سلطان محمود کو چشتی نگر سے موٹر سائیکل سمیت لاپتا کردیا گیا، چھوٹے بچے ہیں شوہر کو تلاش کرنے کیلیے کہاں جاؤں۔

جسٹس نعمت اللہ پھلپھوٹو نے کہا کہ اللہ پر بھروسہ رکھیں پولیس سراغ لگا لے گی، ہم نے رینجرز کو بھی تلاش میں مدد کرنے کا کہہ دیا ہے۔

عدالت عالیہ نے سلطان محمود کا سراغ لگانے کیلیے جے آئی ٹی تشکیل دینے اور رینجرز حکام کو بازیابی کیلیے پولیس سے تعاون کا حکم دیا۔ سندھ ہائیکورٹ نے معاملے کی دو ہفتوں میں رپورٹ بھی طلب کرلی۔