گورنر سندھ کامران ٹیسوری نے متحدہ قومی موومنٹ پاکستان (ایم کیو ایم) کو قبضہ مافیا قرار دے دیا ہے۔

کامران ٹیسوری نے کراچی میں ایسوسی ایشن آف بلڈرز اینڈ ڈویلپرز (آباد) ہاؤس کا دورہ کرکے بلڈرز سے ملاقات کی جنہوں نے گورنر سندھ سے شہر میں زمینوں پر قبضے ہونے کی شکایات کیں۔

اس موقع پر کامران ٹیسوری نے بلڈرز کو اپنا ذاتی قصہ سُناتے ہوئے بتایا کہ ایک بلڈر نے مجھے رات میں کال کرکے قبضے سے آگاہ کیا جس پر میں نے کہا کہ بھائی قبضہ رات میں ہی ہوتا ہے اور جس پارٹی سے نومینیٹ ہوا ہوں وہ رات میں ہی آتے ہیں۔

گورنر سندھ نے قبضہ مافیا کو ملک چھوڑنے کا مشورہ بھی دیتے ہوئے کہا کہ قبضہ مافیا سے کہتا ہوں اپنا بندوبست استنبول یا کسی اور جگہ کرلیں۔

چیرمین آباد الطاف تائی نے کامران ٹیسوری سے مطالبہ کیا کہ تعمیرات کے حوالے سے بحریہ ٹاؤن جیسی سہولیات ایسوسی ایشن کے ممبران کو بھی فراہم کی جائیں۔