اسپیکر پنجاب اسمبلی چوہدر پرویز الہیٰ نے بھی میڈیا ریگولیٹری اتھارٹی بل پر نظر ثانی کا مطالبہ کر دیا۔ وہ کہتے ہیں کہ بلدیاتی اور عام انتخابات اب دور نہیں، ٹھنڈے دل سے حکومت اور پی ٹی آئی رہنماؤں کو یہ بات سمجھانا پڑے گی۔

پاکستان براڈ کاسٹنگ ایسوسی ایشن، اے پی این ایس، سی پی این ای، پی ایف یو جے اور پی یو جے سمیت دیگر نمائندہ صحافتی تنظیموں کے وفد نے اسپیکر پنجاب اسمبلی چودھری پرویزالٰہی سے ملاقات کی۔

ملاقات میں چودھری پرویزالٰہی کا کہنا تھا کہ انہیں امید نہیں کہ وزیراعظم عمران خان میڈیا ریگولیٹری اتھارٹی جیسے متنازعہ بل کی منظوری دیں گے۔ میڈیا ریاست کا چوتھا ستون ہے، اس پر قدغن لگانا ہمارے اپنے مفاد میں نہیں ہے۔

انہوں نے مزید کہا کہ ٹھنڈے دل سے حکومت اور پی ٹی آئی رہنماؤں کو سمجھانا پڑے گا کہ بلدیاتی اور عام انتخابات دور نہیں۔

وفد میں شامل اراکین کا کہنا تھا کہ چودھری پرویزالٰہی نے ہمیشہ میڈیا کے حقوق کیلئے آواز اٹھائی، پنجاب اسمبلی نے میڈیا کے خلاف بل میں اپنی غلطی تسلیم کر کے متنازعہ شق واپس لی۔