آزادکشمیر الیکشن ٹربیونل نے حلقہ ایل اے 16 (شرقی باغ) میں ہونے والے انتخابات کو کالعدم قرار دیتے ہوئے آزادکشمیر کے وزیر حکومت اکبر خان کو نااہل قرار دے دیا ہے۔ الیکشن ٹربیونل کے جج حافظ محمد اکرم نے آج یہ فیصلہ سنایا، جس میں حلقے میں دوبارہ پولنگ کرانے کا حکم بھی دیا گیا۔

یہ فیصلہ پاکستان پیپلز پارٹی کے رہنما قمر الزمان کی جانب سے دائر انتخابی پٹیشن پر سنایا گیا، جس میں اکبر خان کی کامیابی کو چیلنج کیا گیا تھا۔ عدالت نے اپنے فیصلے میں قرار دیا کہ ایل اے سولہ میں ہونے والے انتخابات شفاف اور غیرجانبدارانہ نہیں تھے اور نہ ہی ان میں قانونی تقاضے پورے کیے گئے۔ فیصلے کے مطابق الیکشن کو کالعدم قرار دینے کے مکمل جواز موجود تھے۔

فیصلے کے بعد اکبر خان نہ صرف اپنی نشست سے محروم ہو گئے ہیں بلکہ انہیں وزارت سے بھی نااہل قرار دے دیا گیا ہے۔ ٹربیونل کے اس تاریخی فیصلے کو آزادکشمیر کی سیاست میں ایک بڑا دھچکا قرار دیا جا رہا ہے۔