پشاور میں محکمہ خوراک نے ایکس مل ریٹ پر چینی کی فروخت یقینی بنانے کی ہدایت جاری کر دی ہے۔ پندرہ جولائی سے چینی کی ایکس مل قیمت 165 روپے فی کلو مقرر کی گئی ہے، جبکہ ہر ماہ 2 روپے اضافے کے ساتھ یہ قیمت پندرہ اکتوبر تک 171 روپے فی کلو ہو جائے گی۔ اس حوالے سے باقاعدہ اعلامیہ بھی جاری کیا گیا ہے۔

محکمہ خوراک نے چینی کی ایکس مل ریٹ پر فروخت یقینی بنانے کے لیے تمام اضلاع کو ہدایات جاری کر دی ہیں۔

جاری کردہ اعلامیہ کے مطابق 15 جولائی سے چینی کی ایکس مل قیمت 165 روپے فی کلو مقرر کی گئی ہے، جب کہ ہر ماہ 2 روپے اضافے کے ساتھ یہ قیمت 15 اکتوبر تک 171 روپے فی کلو تک پہنچے گی۔

اعلامیہ میں واضح کیا گیا ہے کہ پرچون قیمت ایکس مل ریٹ سے 8 روپے سے زیادہ نہیں ہونی چاہیے، جب کہ ریٹیل قیمت کے تعین میں کرایہ، یوٹیلیٹی بلز اور لیبر کے اخراجات شامل کیے جا سکتے ہیں۔

مزید برآں، چینی کی قیمتوں میں ضلع وار فرق جغرافیائی حالات کے مطابق کیا جا سکتا ہے۔

محکمہ خوراک نے تمام ڈپٹی کمشنرز اور متعلقہ حکام کو ہدایت کی ہے کہ وہ قیمتوں کے نفاذ کو یقینی بنائیں، روزانہ کی بنیاد پر رپورٹ جمع کروائیں اور خلاف ورزی کی صورت میں قانونی کارروائی عمل میں لائیں۔