کوہستان مالی کرپشن اسکینڈل کی تحقیقات میں پیش رفت ہوئی ہے، پاکستان تحریک انصاف (پی ٹی آئی) کے رہنما اعظم سواتی نیب خیبرپختونخوا میں پیش ہوئے اور گھر کے ثبوت پیش کردیے جبکہ اعظم سواتی کے پہلے دیے گئے جواب پر نیب نے عدم اطمینان کا اظہار کردیا۔

تفصیلات کے مطابق پاکستان تحریک انصاف کے رہنما اور سابق وفاقی وزیر اعظم سواتی کوہستان مالی اسکینڈل میں نیب آفس میں پیش ہوگئے۔

ذرائع کے مطابق نیب خیبر پختونخوا کوہستان میں 40 ارب روپے سے زیادہ کرپشن کی تحقیقات کررہا ہے اور نیب نے اعظم سواتی کے پہلے دیے گئے جواب پر عدم اطمینان کا اظہار کیا تھا۔

نیب کے دفتر پہنچنے پر میڈیا سے گفتگو میں اعظم سواتی نے کہا کہ مکان کے فروخت کی تمام دستاویزات نیب کے حوالے کردیں، کوہستان اسکینڈل میں کرپشن کرنے والوں اور کے پی کے وسائل کو نقصان پہنچانے والوں کو عبرت ناک سزا دی جائے۔

پی ٹی آئی رہنما نے مزید کہا کہ آج پتہ چل جائے گا سینیٹ انتخابات پر کے پی حکومت کا اتفاق ہوگیا یا نہیں، بانی پی ٹی آئی نے جس طرح کہا تھا اسی طرح سینیٹ کے ٹکٹس تقسیم کیے گئے۔

اس دوران صحافی نے اعظم سواتی سے علی امین گنڈاپور کے احتجاج کے لیے 90 دن سے متعلق سوال کیا جس پر انہوں نے جواب دینے سے گریز کیا اور چلے گئے۔