جیکب آباد میں ریلوے ٹریک پر زور دار دھماکہ ہوا جس کے نتیجے میں جعفر ایکسپریس کی چھ بوگیاں پٹری سے اتر گئیں۔ واقعے میں کسی قسم کے جانی نقصان کی اطلاع نہیں ملی۔

ایس ایس پی جیکب آباد کے مطابق دھماکے کے نتیجے میں کوئی جانی نقصان نہیں ہوا۔ واقعے کے فوراً بعد پولیس نے علاقے کو گھیرے میں لے لیا اور بم ڈسپوزل اسکواڈ کو طلب کر لیا گیا۔

ایس ایس پی کے مطابق بم ڈسپوزل یونٹ دھماکے کی نوعیت جانچنے میں مصروف ہے تاکہ یہ معلوم کیا جا سکے کہ دھماکا حادثاتی تھا یا کسی تخریبی کارروائی کا نتیجہ تھا ۔

پولیس اور قانون نافذ کرنے والے ادارے دھماکے کے محرکات جاننے کے لیے تحقیقات میں مصروف ہیں جبکہ علاقے میں سرچ آپریشن بھی جاری ہے۔

واقعے کے بعد ٹرین کی آمدورفت معطل کر دی گئی جبکہ متاثرہ ٹریک کی مرمت اور بحالی کے لیے ریلوے عملہ متحرک ہے۔ ریسکیو ٹیموں نے بروقت کارروائی کرتے ہوئے بوگیوں میں پھنسے مسافروں کو بحفاظت نکال لیا۔

ریلوے حکام کے مطابق ٹریک کی مکمل بحالی میں چند گھنٹے لگ سکتے ہیں، جبکہ واقعے کی مکمل تحقیقات کا آغاز کر دیا گیا ہے۔