کراچی کے تعلیمی اداروں میں امتحانی پیپرز آوٹ ہونے اور نقل کی روک تھام کے لیے انٹربورڈ نے ایف آئی اے کو خط لکھ دیا ، خط میں سوشل میڈیا پر پرچے آؤٹ کرانے اور نقل میں ملوث افراد کے خلاف کارروائی کی درخواست کی گئی ہے۔

شہرِ قائد میں انٹرمیڈیٹ امتحانات سے قبل ہی پیپرز آؤٹ ہونے اور منظم نقل کے بڑھتے واقعات پر انٹر بورڈ کراچی نے وفاقی تحقیقاتی ادارے (ایف آئی اے) کو خط لکھ کر فوری کارروائی کا مطالبہ کیا ہے۔

انٹر بورڈ کی جانب سے بھیجے گئے خط میں کہا گیا ہے کہ امتحانی پرچوں کے افشا، حل شدہ جوابات کی غیر قانونی فروخت، اور سوشل میڈیا پر منظم نقل کے سلسلے کو روکنے کے لیے ایف آئی اے سائبر کرائم ونگ فوری طور پر مداخلت کرے۔

خط میں نشاندہی کی گئی ہے کہ مختلف واٹس ایپ گروپس اور سوشل میڈیا پلیٹ فارمز پر امتحانی مواد لیک کیا جا رہا ہے اور طلبہ کو پیسے کے عوض حل شدہ جوابات فراہم کیے جا رہے ہیں، جو کہ سائبر جرائم کے زمرے میں آتا ہے۔

انٹرمیڈیٹ امتحانات 5 مئی سے شروع ہو کر 29 مئی تک جاری رہیں گے۔ خط میں کہا گیا ہے کہ دھوکہ دہی کے طریقے اب سائبر جرائم کی شکل اختیار کر چکے ہیں، ایف آئی اے سائبر کرائم ونگ ان گروپس کی مکمل تحقیقات کریں اور ان کے منتظمین کا سراغ لگا کر قانونی کارروائی کریں۔