سابق وفاقی وزیر اور سربراہ عوامی مسلم لیگ (اے ایم ایل) شیخ رشید کا کہنا ہے کہ ہم پر اتنے کیسز ہیں شاید ضمانت والے بھی نہ ملیں۔

ایک بیان میں شیخ رشید نے کہا کہ 30 اگست سے پہلے الیکشن کا اعلان ہوجانا چاہئے، مسائل کا انتخابات کے علاوہ کوئی دوسرا حل نہیں۔

انہوں نے کہا کہ عوام کی حالت بہت زیادہ خراب ہے، موجودہ دور میں لوگ ذہنی مریض ہوچکے ہیں جب کہ حکومت تاحال گورنر اسٹیٹ بینک تعینات کرسکی اور نہ آئی ایم ایف نے انہیں ابھی تک ایک ڈالر دیا ہے۔

شیخ رشید کا کہنا تھا کہ امپورٹڈ حکومت کے دن گنے جا چکے ہیں، کل سے سیاست ایک نیا رُخ اختیار کرے گی، پی ڈی ایم کی 14جماعتیں 28 بھی ہوجائیں تو کچھ نہیں کرسکیں گی جنہیں عمران خان ایک ٹھوکر میں اڑا دیں گے۔

سابق وفاقی وزیر نے مزید کہا کہ جہاں منڈی لگتی ہے وہاں آصف زرداری موجود ہوتا ہے جس نے دو بھائیوں میں بھی لڑائی کرادی ہے۔