کوئٹہ کے ایوب نیشنل اسٹیڈیم کی بجلی منقطع کردی گئی ہے جس کے باعث وہاں جاری نیشنل گیمز کے متعدد ایونٹس متاثر ہوگئے۔

محکمہ کھیل بلوچستان کیسکو کا نادہندہ نکلا، اور واجبات کی عدم ادائیگی پر کوئٹہ کے ایوب نیشنل اسٹیڈیم کی بجلی منقطع کردی گئی ہے۔

کیسکو حکام کے مطابق محکمہ کھیل کے ذمہ کیسکو کے 39 لاکھ 14 ہزار 423 روپے واجبات ہیں، اور محکمہ کھیل نے بلوں کی ادائیگی پر ٹال مٹول سے کام لیا، جس وجہ سے اسٹیڈیم کی بجلی منقطع کردی ہے۔

دوسری جانب کوئٹہ کے ایوب نیشنل اسٹیڈیم میں نیشنل گیمز جاری ہیں، اور بجلی کی سپلائی معطل ہونے پر نیشنل گیمز کے کئی ایونٹس متاثر ہوگئے ہیں۔

واضح رہے کہ کوئٹہ میں 19سال بعد نیشنل گیمز ہورہے ہیں، اور 22 مئی کو وزیراعظم شہبازشریف نے 34 ویں نیشنل گیمز کا باقاعدہ افتتاح کیا تھا۔