پاکستان اور مصر کے سفارتی تعلقات کی 75 ویں سالگرہ کے موقع پر قاہرہ میں تقریب کا اہتمام کیا گیا۔ جس میں پاکستان اور مصر کے درمیان ہر سطح پر دوطرفہ تعلقات کو مزید مضبوط بنانے کے عزم کا اعادہ کیا گیا۔

مصر کے پبلک بزنس سیکٹر کے وزیر انجینئرمحمود عصمت تقریب کے مہمان خصوصی تھے۔ غیرملکی سفیروں اور مصر میں زندگی کے مختلف شعبوں سے تعلق رکھنے والی ممتاز شخصیات نے تقریب میں شرکت کی۔ تقریب میں مصری حکومت کے عہدیداران، ارکان پارلیمنٹ، تاجر برادری، ماہرین تعلیم نے بھی شرکت کی۔

مصر میں پاکستان کے سفیرساجد ہلال نے تقریب سے خطاب کرتے ہوئے کہا کہ گزشتہ برسوں کے دوران دوطرفہ تعلقات سیاسی، اقتصادی، دفاعی اور ثقافتی تعاون کو مضبوط بنانے کا باعث بنے ہیں، پاکستان ان تعلقات کو پائیدار شراکت داری میں تبدیل کرنے کے لیے پرعزم ہے۔

مصرکے پبلک بزنس سیکٹر کے وزیرانجینئرمحمود عصمت نے پاکستان اور مصر کے درمیان ہر سطح پر دوطرفہ تعلقات کو مزید مضبوط بنانے کے عزم کا اعادہ کیا۔ اس موقع پر دونوں ملکوں کے سفارتی تعلقات کے قیام کی 75 ویں سالگرہ کا کیک بھی کاٹا گیا۔