کراچی کے علاقے دہلی کولونی میں گزشتہ روز سونیا نامی 28 سالہ خاتون کی لاش ملنے پر سینئیر سپرنٹنڈنٹ آف پولیس (ایس ایس پی) جنوبی اسد رضا کا کہنا ہے کہ خاتون کو گلا گھونٹ کر قتل کیا گیا ہے، خاتون کے قتل کے الزام میں شوہر، پہلی بیوی اور سالی گرفتار ہیں جن کے خلاف مقدمہ درج کیا جا رہا ہے۔

پولیس کے مطابق مقتولہ کے والد لیاقت نذیر نے بتایا کہ میری بیٹی نے بڑے بھائی کے بیٹے سے پسند کی شادی کی تھی جو پہلے سے شادی شدہ تھا۔

والد کا کہنا ہے کہ بڑے بھائی کے بیٹے کی پہلی بیوی اور سالی نے مل کر سونیا کو قتل کیا ہے، بیٹی کے سر پر چوٹوں کے زخم ہیں اور اب تک خون بہہ رہا ہے۔

پولیس نے دونوں خواتین کو حراست میں لے لیا ہے۔

خاتون کی لاش گزشتہ روز ملی تھی، پولیس نے خاتون کو گھریلو ملازمہ قرار دیتے ہوئے کہا تھا کہ مقتولہ نے مبینہ طور پر باسی چاول کھائے تھے، گزشتہ ایک ہفتے سے پیٹ میں درد کی شکایت بھی کر رہی تھی۔

پولیس کا کہنا ہے کہ پوسٹ مارٹم مکمل ہونے کے بعد ہی حتمی طور پر کچھ کہا جا سکتا ہے۔