نیٹ فلکس کی معروف ویب سیریز دی کراؤن کی مرکزی کاسٹ میں شامل پاکستانی اداکار ہمایوں سعید نے انکشاف کیا ہے کہ لیڈی ڈیانا کے اسلام قبول کرنے سے متعلق سین کو فلمانے کے باوجود نشر نہیں کیا گیا۔

گزشتہ ہفتے اداکار واسع چوہدری کے پروگرام مذاق رات میں گفتگو کرتے ہوئے ہمایوں سعید نے دی کراؤن سیریز کے حوالے سے بتایا کہ حالیہ سیریز کے 9ویں قسط کے ایک سین کو کاٹ دیا گیا ۔

ہمایوں سعید نے بتایا کہ ایک سین کو فلمانے کے باوجود کاٹ دیا گیا جو لیڈی ڈیانا کے اسلام قبول کرنے سے متعلق تھا۔

ہمایوں سعید نے بتایا کہ اس سین میں لیڈی ڈیانا ڈاکٹر حسنات کو رو رو کر بتا رہی تھیں کہ وہ ان کے لیے اسلام قبول کرنا چاہتی ہیں لیکن اس سین کو قسط کا دورانیہ زیادہ ہونے کی وجہ سے بعد میں کاٹ دیا گیا جس کا مجھے افسوس ہے کیونکہ میرے لحاظ سے یہ بہت اہم سین تھا۔

برطانوی شاہی خاندان پربنی ویب سیریز دی کراؤن میں پاکستانی ڈاکٹر حسنات کا کردار ادا کرنے والے ہمایوں سعید کا کہنا ہے کہ ڈیانا ڈاکٹر حسنات کیلئے اسلام قبول کرنا چاہتی تھیں۔

واضح رہے کہ نیٹ فلکس کے لیے تیار کیے جانے والے دی کراؤن کے سیزن 5 میں شاہی خاندان کی نوے کی دہائی کے واقعات اورشاہی خاندان کی زندگی کے مخلتف لمحات کی منظر کشی کی گئی ہے۔

ہمایوں سعید اس سریز میں شہزادی ڈیانا کا کردار ادا کرنے والی الزبتھ ڈیبیکی کے مقابل ڈاکٹر حسنات خان کا کردار اداکیا ہے۔

ڈاکٹر حسنات خان لیڈی ڈیانا کی زندگی میں وہ آدمی تھے جن سے متعلق کہا جاتا ہے کہ ان پر لیڈی ڈیانا فدا تھیں۔

لیڈی ڈیانا اور ڈکٹر حسنات کے درمیان تعلق 1995 سے 1997 تک برقرار رہا، یہاں تک کہ لیڈی ڈیانا نے پاکستان کے دورے کے دوران ڈاکٹر حسنات کے والدین سے بھی ملاقات کی۔