اقتصادی رابطہ کمیٹی نے مختلف ترقیاتی اور دیگر اسکیموں کے لئے اربوں روپے کی منظوری دے دی۔

وفاقی وزیرخزانہ اسحاق ڈار کی زیرصدارت کابینہ کی اقتصادی رابطہ کمیٹی کا اجلاس ہوا، جس میں میں وفاقی وزرا نوید قمر، خرم دستگیر، عائشہ غوث پاشا، مصدق ملک، شاہد خاقان عباسی، طارق باجوہ، طارق محمود پاشا، وفاقی سیکرٹریز اور دیگر سینئر افسران نے شرکت کی۔

اجلاس میں موجود مالی سال کے دوران ملک بھر میں ڈویلوپمنٹ اسکیموں کیلیے وزارت ہاوسنگ کو 14 ہزار 802 ملین دینے کی منظوری دی گئی ہے، موجودہ مالی سال کے دوران 15 ترقیاتی اسکیموں پرعملدرآمد کیلئے 1209 ملین منظور کئے جائیں گے، اس کے علاوہ موجود مالی سال کے دوران پائیدار ترقیاتی اہداف کے حصول کے پروگرام کے لیے کابینہ ڈویژن کیلئے 5 ارب منظورکئے گئے ہیں۔

اقتصادی رابطہ کمیٹی نے پنجاب میں ترقیاتی اسکیموں کیلئے وزارت ہاوسنگ کوایک ارب کی گرانٹ منظوری دے دی، جب کہ پنجاب اور کے پی میں پی ایس ڈی پی کے تحت ترقیاتی اسکیموں کیلئے وزارت توانائی کیلئے 1773 ملین منظورہوئے۔

اجلاس میں وزارت نارکوٹکس کنٹرول کیلئے 13 کروڑ منظور کئے گئے، انسداد منشیات فورس کی آپریشنل لاگت کے لیے وزارت نارکوٹکس کنٹرول کو 80 لاکھ دیئے جائیں گے، بجٹ گرانٹ کی کمی کو پورا کرنے کے لیے ریونیو ڈویژن کو 60 لاکھ دینے کی منظوری دی گئی ہے، جب کہ ہائر ایجوکیشن ڈویلوپمنٹ کیلئے وزارت وفاقی تعلیم کیلئے 3 ارب 96 کروڑمنظور کئے گئے ہیں۔