Aaj News

جمعرات, مارچ 28, 2024  
17 Ramadan 1445  

کون بنے گا میئر کراچی : پیپلزپارٹی اور تحریک انصاف کا باغی گروپ ایک ہوگیا

پیپلزپارٹی بھی دو دھڑوں میں تقسیم ہے، ذرائع
شائع 22 مئ 2023 11:41am

میئر کراچی کے حوالے سے پیپلزپارٹی اور پی ٹی آئی کے باغی گروپ کے درمیان ہونے والے مذاکرات کامیاب ہوگئے ہیں، جس کے بعد ذرائع کا کہنا ہے کہ پی ٹی آئی کے9 ووٹ پیپلزپارٹی کے امیدوار کو ملیں گے۔

گزشتہ روز صوبائی وزیر سعید غنی نے پریس کانفرنس کرتے ہوئے کراچی کے میئر کے حوالے سے اعداد و شمار بتائے تھے اور کہا تھا کہ بلدیاتی انتخابات میں ہماری 173 نشستیں ہیں، جب کہ تحریک انصاف اور جماعت اسلامی مل جائیں تو ان کی نشستیں 193 بنتی ہیں۔

سعید غنی نے دعویٰ کیا تھا کہ میئر کے الیکشن میں جماعت اسلامی اپنے ووٹ بھی مکمل نہیں کرسکے گی، جب کہ پی ٹی آئی کے بھی کئی اراکین جماعت اسلامی کو ووٹ نہیں دیں گے، میئر کراچی پیپلز پارٹی کا جیالا ہی ہوگا۔

ذرائع کا کہنا ہے کہ پیپلزپارٹی نے جماعت اسلامی کو ڈپٹی میئر اور 3 ٹاؤن دینے کی پیشکش کی تھی، تاہم جماعت اسلامی حافظ نعیم الرحمان کو میئر بنانا چاہتی ہے۔

ذرائع نے بتایا کہ جماعت اسلامی اور پیپلزپارٹی کے درمیان مذاکرات کے امکانات ختم ہوگئے ہیں، کیوں کہ پیپلز پارٹی اور پی ٹی آئی کے باغی گروپ کے درمیان مذاکرات کامیاب ہوگئے ہیں، اور اب پی ٹی آئی کے تمام ووٹ جماعت کو نہیں ملیں گے۔

ذرائع کا کہنا ہے کہ پیپلزپارٹی کو کراچی میں اپنا میئر بنانے کیلئے 9 سیٹوں کی ضرورت ہے، اور پی ٹی آئی کے 9 ووٹ پیپلز پارٹی کے امیدوارکوملیں گے، جس کے بدلے پی ٹی آئی کے باغی گروپ کو ڈپٹی میئر کی سیٹ دی گئی ہے۔

میئر کراچی کیلئے پیپلزپارٹی دو حصوں میں تقسیم

ذرائع کا کہنا ہے کہ میئرکراچی کے لئے پیپلزپارٹی دو حصوں میں تقسیم ہوگئی ہے، پیپلزپارٹی کا دھڑا مرتضیٰ وہاب کی حمایت کررہا ہے، جب کہ دوسرا دھڑا نجمی عالم اور مسرور احسن کو میئر کراچی بنوانا چاہتا ہے، اس حوالے سے پیپلزپارٹی کا حتمی اعلان آئندہ ہفتے متوقع ہے۔

ذرائع نے بتایا کہ کراچی کے میئر اور ڈپٹی میئر کیلئے پیپلزپارٹی کو 10 سے زائد درخواستیں موصول ہوچکی ہیں، اور ان درخواست گزاروں میں پیپلزپارٹی کراچی کے سرکردہ اور سینئر رہنما شامل ہیں، جب کہ کراچی کے میئر کیلئے تین بڑے نام بھی شامل ہیں۔

Murtaza Wahab

Hafiz Naeem ur Rehman

Jamat e Islami

Pakistan People's Party (PPP)

Comments are closed on this story.

تبصرے

تبولا

Taboola ads will show in this div