انگلش فاسٹ بولرجیمز اینڈرسن نے دی ہنڈرڈ لیگ میں پاکستان کرکٹ ٹیم کے کپتان بابراعظم کو پک نہ کرنے پر حیرت کا اظہار کردیا۔

برطانوی نشریاتی ادارے سے گفتگو میں جیمز اینڈرسن نے کہاکہ بابرکو ہنڈر ڈ لیگ میں پِک نہ کیے جانے پر حیران ہوں، میں ہوتا تو بابراعظم کی دگنی قیمت لگاتا، میں اسے اپنی فرنچائز میں شامل کرنے کے لئے سارا بجٹ لگا دیتا۔

انگلش فاسٹ بولر نے کہا کہ ممکن ہے بابر اعظم کو سیزن کے لئے مکمل دستیاب نہ ہونے پر کسی نے پک نہیں کیا۔

رپورٹس کے مطابق دی ہنڈرڈ لیگ کا آغاز یکم اگست سے ہوگا۔

واضح رہے کہ بابراعظم کو دی ہنڈرڈ لیگ کے ڈرافٹ میں کسی ٹیم نے پِک نہیں کیا تھا۔

ڈرافٹنگ میں فاسٹ بولر شاہین شاہ آفریدی پاکستان کے سب سے مہنگے کھلاڑی رہے، انہیں ویلش فائر نے ایک لاکھ پاؤنڈ میں پِک کیا۔

فاسٹ بولر حارث رؤف بھی 60 ہزار پاؤنڈ میں ویلش فائر کا حصہ بنے جبکہ اوول انونسیبلز نے فاسٹ بولر احسان اللہ کو 40 ہزار پاؤنڈ میں پِک کیا اور شاداب خان بھی ایک لاکھ پاؤنڈ میں برمنگھم فینکس کا حصہ بنے۔