کراچی میں گرفتار ملزمان سے برآمد اسلحہ شہری کے قتل میں استعمال ہتھیار کی فارنزک میں میچ کرگیا۔

پولیس نے 8 مارچ کو نارتھ کراچی میں مبینہ پولیس مقابلے میں دو ملزمان کو گرفتار کیا تھا، ملزمان سے برآمد اسلحہ شہری کے قتل میں استعمال ہتھیار کی فارنزک میں میچ کرگیا۔

پولیس کے مطابق ملزمان نے شہری مزمل کو اہلیہ اور بچوں کے سامنے سولہ فروری کو نارتھ کراچی میں قتل کیا تھا، پکڑے گئے جرائم پیشہ افراد نے مقتول کی اہلیہ کا پرس چھیننے کے بعد فائرنگ کی تھی۔

تفتیشی پولیس کا کہنا ہے کہ ملزمان نے اندرون سندھ سے کراچی آکر متعدد وارداتیں کیں، گرفتار کیے گئے دونوں افراد نے قتل کی ایک اور واردات کا اعتراف بھی کیا ہے، جس کے بعد ملزمان کا اسلحہ قتل کی دوسری واردات سے میچ کرانے لیب بھیجا گیا ہے۔

پولیس نے مزید بتایا کہ ملزمان نے 7 مارچ پر گشت پر مامور پولیس پر بھی فائرنگ کی تھی جس کے نتیجے میں دو پولیس اہلکار اور سوزو کی ڈرائیور زخمی ہوا تھا، ملزم فائرنگ کرتے ہوئے فرار ہوگئے تھے۔ ملزمان کی گرفتاری کے بعد اندرون سندھ میں کراچی پولیس کے خلاف احتجاج بھی کیا گیا تھا۔