Aaj News

منگل, مارچ 19, 2024  
08 Ramadan 1445  
Live
turkiye

دپیکا اور ہریتک کے ساتھ کام کی خواہشمند مقبول تُرک اداکارہ بھارت پہنچ گئیں

' کافی عرصے سے بھارت آنے کا ارادہ تھا جسے بالآخرعملی جامہ پہنا دیا'
شائع 11 مارچ 2024 04:04pm
تصویر: حانڈے ایرسل /انسٹاگرام
تصویر: حانڈے ایرسل /انسٹاگرام

ترکیہ کی نامور اداکارہ حانڈے ایرسل (Hande Ercel) بھارت پہنچ گئیں، اداکارہ بالی ووڈ اسٹارز کے ساتھ کام کرنے کی خواہشمند ہیں۔

پہلی بار بھارت پہنچنے والی حانڈے کا کہنا ہے کہ وہ ہریتک روشن اور دپیکا پڈوکون کے ساتھ کام کرنا چاہتی ہیں۔

ترک اداکارہ آئی سی سی آئی فریمز 2024 کے لیے بھارت میں موجود ہیں۔

حانڈے نے انستاگرام پر اداکار ایوشمان کھرانہ کے ساتھ ایک ویڈیو شیئر کی جس میں وہ ہندی بول رہی ہیں۔

ایک انٹرویو کے دوران 30 سالہ اداکارہ نے کہا کہ اُن کا کافی عرصے سے بھارت آنے کا ارادہ تھا جسے بالآخر انہوں نے عملی جامہ پہنا دیا۔

حانڈے کے مطابق انہوں نے سوچا تھا کہ بھارت میں ان کے کچھ مداح ہوں گے لیکن یہاں بہت زیادہ تعداد دیکھنے کو ملی جس کی انہیں توقع نہیں تھی۔

ترک اداکارہ کا مزید کہنا تھا کہ وہ بالی وڈ کو کافی قریب سے دیکھتی رہی ہیں اور اُن کا کام بہت زبردست ہے، وہ بالی اسٹارز میں سے ہریتک روشن اور دپیکا پڈوکون کے ساتھ کام کرنے کی خواہش رکھتی ہیں۔

انٹرویو کے دوران اداکارہ کا مزید کہنا تھا کہ وہ اپنے تمام چاہنے والوں سے ملاقات کی خواہش رکھتی ہیں لیکن ایسا ممکن نہیں تاہم مداح ان کے دل میں ایک خاص مقام رکھتے ہیں۔

روس سے مصالحت، یوکرین نے ترک پیشکش مسترد کردی

زیلینسکی کا ترکیہ کا دورہ، یوکرین جنگ نے بحران پیدا کردیے، صدر اردوان کی پریس کانفرنس
شائع 10 مارچ 2024 09:41am

ترکیہ کے صدر رجب طیب اردوان نے یوکرین اور روس کے درمیان مصالحت کروانے کے لیے سربراہ ملاقات کی میزبانی کی پیشکش کی ہے۔ یوکرین نے اس پیشکش کو قبول کرنے سے معذرت کرلی ہے۔

یوکرین کے صدر وولودومیر زیلینسکی نے گزشتہ روز ترکیہ کا دورہ کیا۔ انہوں نے ترک ہم منصب رجب طیب اردوان سے یوکرین جنگ سے پیدا شدہ صورتِ حال کے بارے میں تبادلہ خیال کیا۔ دونوں صدور نے یوکرین جنگ کے نتیجے میں پورے خطے کے لیے پیدا ہونے والے بحران پر تشویش ظاہر کی اور کہا کہ یہ جنگ جلد از جلد ختم ہونی چاہیے۔

ترکیہ کے صدر نے یوکرینی ہم منصب کو پیشکش کی کہ اگر وہ چاہیں تو روس کو آن بورڈ لے کر سربراہ مذاکرات کیے جاسکتے ہیں۔ بات چیت کے بعد استنبول میں پریس کانفرنس کرتے ہوئے ترکیہ کے صدر نے کہا کہ یوکرین میں جاری جنگ نے کئی ممالک کے لیے بحرانی کیفیت پیدا کی ہے۔

ترک صدر کا یہ بھی کہنا تھا کہ یوکرین میں جنگ کے مزید طول پکڑنے سے کئی خطوں کے لیے شدید بحرانی کیفیت پیدا ہوسکتی ہے۔

ترکی معاہدہ شمالی بحرِ اوقیانوس کی تنظیم (نیٹو) کا رکن ہے۔ وہ چاہتا ہے کہ روس اور یوکرین سے اپنے تعلقات متوازن رکھے۔ اس بلینسنگ ایکٹ کے لیے اس نے روس اور یوکرین کو کئی بار مصالحت کے حوالے سے ثالثی کی پیشکش کی ہے۔

یوکرین نے یورپی یونین کی رکنیت کے حصول کی جو کوششیں کی ہیں ان سے مشتعل ہوکر روسی قیادت نے یوکرین پر حملہ کیا۔ ترکیہ اس حوالے سے معاملات کو قابلِ قبول سطح پر لانے کے لیے کوشاں ہے۔

یوکرین کے صدر کا کہنا تھا کہ ان کا ملک روس سے براہِ راست بات چیت کے حق میں نہیں۔ یوکرین کی قیادت نے 10 نکات سامنے رکھے ہیں۔ جب تک ان پر اتفاق نہیں ہو جاتا، جنگ بند کرنے سے متعلق گفت و شنید نہیں ہوسکتی۔ یوکرین چاہتا ہے کہ روسی قیادت یوکرین کے حقِ سالمیت کو تسلیم کرے، تمام مقبوضہ علاقے خالی کرے، فوڈ سیکیورٹی یقینی بنائے، جنگ کے دوران قید کیے جانے والے تمام یوکرینی باشندوں کو رہا کرے، جارحیت اور مظالم کے مرتکب افراد کے تعین کے لیے ٹربیونل قائم کیا جائے اور یوکرین پر دوبارہ حملہ نہ کرنے کی ضمانت دی جائے۔

تین ممالک سے بیدخل افغان مہاجرین ایک ساتھ واپس، کابل حکومت سے ملازمتوں کا مطالبہ

رواں سال کے آغاز سے اب تک ایران، پاکستان اور ترکی سے ڈیڑھ لاکھ سے زائد تارکین افغانستان واپس پہنچے ہیں۔
اپ ڈیٹ 05 مارچ 2024 03:20pm

ایران اور ترکی سے بے دخل کیے جانے والے افغانوں نے وطن واپس پہنچ کر کابل حکومت سے سہولیات اور ملازمتیں دینے کا مطالبہ کردیا۔

پناہ گزینوں اور وطن واپسی کی وزارت نے طلوع نیوز کو بتایا ہے کہ ایک ماہ کے دوران ایران، پاکستان اور ترکی سے 96 ہزار سے زائد تارکین وطن واپس آئے ہیں۔وزارت کے مطابق واپس آنے والے تمام افراد کو مدد فراہم کی گئی ہے۔

انہوں نے کہا کہ دالو کے مہینے میں پاکستان، ایران اور ترکی سے 96 ہزار 490 تارکین وطن واپس آئے۔ ہماری کمیٹیاں ہسرحدوں پر انہیں سفری الاؤنس، خوراک اور غیر غذائی امداد اور موسم سرما کے کپڑے فراہم کرتی ہیں جس کے بعد انہیں ان کے اصل صوبوں [ریاستوں] میں منتقل کر دیا جاتا ہے۔

پناہ گزینوں اور وطن واپسی کی وزارت کے نائب وزیر عبدالرحمن رشید نے بتایا کہ ہر خاندان کو دس ہزار نقد امداد دی جاتی ہے۔

اس کے ساتھ ہی ملک واپس آنے والے کچھ تارکین وطن امارت اسلامیہ سے مطالبہ کررہے ہیں کہ ان کے لیے روزگار کے مواقع پیدا کیے جائیں۔

طلوع نیوز سے بات کرتے ہوئے پاکستان سے اپنے 7 رکنی خاندان کے ساتھ وطن واپس پہنچنے والے پیندا نے مہاجرت کی مشکلات کے بارے میں بات کرتے ہوئے کہا کہ، ’وہ ہم سے پیسے لیتے تھے۔ ہم آزادانہ طور پر گھوم پھر بھی نہیں سکتے تھے اور نہ ہی ڈاکٹر کے پاس جا سکتے تھے، اسی لیے ہم افغانستان آئے۔‘

ایران سے واپس آنے والوں میں سے نازنین نامی خاتون نے بتایا کہ ’وہ میرے شوہر کو لے گئے اور بعد میں میرے شوہر نے فون کر کے کہا کہ انہیں قید کر دیا گیا ہے،4 دن بعد میں نے جا کر کہا کہ ہمیں 3 دن دیں، ہم یہاں سے چلے جائیں گے۔‘

تارکین وطن میں سے ایک خیرالدین نے کہا کہ، ’حکومت کو روزگار کے مواقع فراہم کرنے چاہئیں تاکہ کوئی بھی دوبارہ ایران واپس نہ جائے اور ہم سب اپنے وطن میں اپنی زندگیوں کو ترقی دے سکیں۔‘

وزارت مہاجرین اور وطن واپسی کے اعداد و شمار کے مطابق رواں شمسی سال کے آغاز سے اب تک ایران، پاکستان اور ترکی سے ڈیڑھ لاکھ سے زائد تارکین وطن افغانستان واپس پہنچے ہیں۔

سعودی ولی عہد محمد بن سلمان کا شہباز شریف کیلئے نیک تمناؤں کا اظہار

وزیراعظم شہباز شریف کے وزیراعظم منتخب ہونے پر برطانیہ ، ترکیہ، چین اور ایران کی بھی مبارکباد
اپ ڈیٹ 04 مارچ 2024 09:05pm

سعودی ولی عہد شہزادہ محمد بن سلمان نے نو منتخب وزیر اعظم شہبازشریف کے لئے نیک تمناؤں کا اظہار کیا ہے۔ اس کے علاوہ برطانوی وزیرخارجہ ڈیوڈ کیمرون، ترک صدر رجب طیب اردوان، چینی صدر شی جن پنگ اور ایرانی صدر ابراہیم رئیسی نے بھی شہباز شریف کو پاکستان کا وزیر اعظم منتخب ہونے پر مبارکباد پیش کی ہے۔

ولی عہد شہزادہ محمد بن سلمان نے پاکستانی وزیر اعظم شہباز شریف کو حلف اٹھانے پر مبارکباد پیش کی ہے۔

سعودی پریس ایجنسی کے مطابق محمد بن سلمان نے وزیر اعظم شہباز شریف کو تہنیتی پیغام روانہ کیا ہے۔

ولی عہد شہزادہ محمد بن سلمان نے وزیر اعظم شہباز شریف کے لیے نیک تمناؤں کا اظہار کیا ہے اور پاکستان کے لیے ترقی و کامرانی کی امید ظاہر کی ہے۔

برطانوی وزیرخارجہ

برطانوی وزیرخارجہ ڈیوڈ کیمرون نے سماجی رابطے کی ویب سائیٹ ”ایکس“ پر اپنے پیغام میں کہا کہ شہبازشریف کی حکومت کے ساتھ ملکر کام کرنے کے منتظر ہیں، پاکستانی حکومت کو ساتھ لیکر کام کرنےکی ضرورت ہے۔

ڈیوڈ کیمرون نے کہا کہ پاکستان تاریخ کے نازک ترین موڑ پر ہے، پاکستانی حکومت کو اصلاحات کرنے کی ضرورت ہے۔

ترک صدر

ترکیہ کے صدر رجب طیب اردوان نے نومنتخب وزیراعظم شہباز شریف کو فون کرکے مبارکباد دی اور پاکستان کو ترقی کی راہ پر گامزن کرنے کی شہباز شریف کی صلاحیت پر اعتماد کا اظہار کیا۔

صدر رجب طیب اردوان نے توقع ظاہر کی کہ وزیر اعظم شہباز شریف اپنی بہترین صلاحیتوں کو بروئے کار لا کر پاکستان کو ترقی اور خوشحالی کی راہ پر گامزن کریں گے۔

نومنتخب وزیراعظم نے مبارکباد کے پیغام پر صدر رجب طیب اردوان کا شکریہ ادا کیا۔

شہباز شریف نے پاکستان اور ترکی کے برادرانہ تعلقات کی اہمیت پر زور دیا اور تمام شعبوں میں دوطرفہ تعاون کو مزید آگے بڑھانے کے عزم کا اعادہ کیا۔

چینی صدر

دوسری جانب چین کے صدر شی جن پنگ نے بھی نومنتخب وزیراعظم شہباز شریف کے لیے نیک تمناؤں کا پیغام بھیجا۔

چینی صدر نے کہا کہ امید ہے شہبازشریف کی قیادت میں پاکستان نئی اور مزید کامیابیاں حاصل کرے گا، مشترکہ طور پر چین پاکستان اقتصادی راہداری کا اپ گریڈڈ ورژن تعمیر کرنا ہوگا۔

ایرانی صدر

ایران کے صدر ابراہیم رئیسی نے بھی شہباز شریف کو پاکستان کا وزیراعظم منتخب ہونے پر مبارک باد دی۔

ایرانی صدر نے دونوں اسلامی برادر مملک کے تعلقات کو مزید مضبوط بنانے کے عزم کا اظہار کیا ۔

صدر رئیسی نے امید ظاہر کی کہ نئی حکومت پاکستانی عوام اور ملک کی ترقی کے لیے بھرپور کوشش کرے گی ۔ انہوں نے اس خواہش کا اظہار کیا کہ دونوں مملک باہمی تعلقات کو فروغ دینے کیلیے مل کر کام کریں گے ۔

ایرانی سفیر

ادھر پاکستان میں ایرانی سفیر رضا امیری مقدم نے بھی وزیراعظم شہبازشریف کو مبارکباد پیش کی۔

نومنتخب وزیراعظم نے مبارکباد کے پیغام پر ترک صدر، چینی صدر اور ایرانی سفیر کا شکریہ ادا کیا اور تینوں ممالک کے ساتھ دو طرفہ تعاون کو مزید آگے بڑھانے کے عزم کا اعادہ کیا۔

ترکیہ کے پہلے لڑاکا جنگی طیارے ’قان‘ کی کامیاب پرواز

'یہ ترکیہ کا کارنامہ ہے اور ہم آئندہ بھی اسی طرح کے کارنامے کرتے رہیں گے۔' صدر رجب طیب ایردوان
شائع 22 فروری 2024 12:36pm
تصویر: ٹی آر ٹی
تصویر: ٹی آر ٹی

ترکیہ کے پہلے ’ففتھ جنریشن وا‘ محارب طیارے ’قان‘ نے پہلی پرواز کامیابی سے مکمل کر لی۔ تُرک صدر رجب طیب ایردوان کا کہنا ہے کہ، ’یہ ترکیہ کا کارنامہ ہے اور ہم آئندہ بھی اسی طرح کے کارنامے کرتے رہیں گے۔‘

فضائی و خلائی صنعت TUSAŞ کے اہم ترین ٹیکنالوجی منصوبوں میں شامل ’قان‘ کی پہلی کامیاب پرواز سے ترکیہ ففتھ جنریشن طیارہ بنانے والے ممالک میں شامل ہو گیا ہے۔

طیارے کی اہم خصوصیات میں ڈبل موٹر، پلٹ جھپٹ اور راڈار سےچھُپنے کی اعلیٰ صلاحیت، باڈی میں اسلحہ اٹھانے اور برقی حرب قابلیت نمایاں خصوصیات ہیں۔

ملّی محارب طیارہ قان فضاء سے فضائی اور فضاء سے زمینی اہداف کے خلاف اسڑیٹجک محاربے کے امکانات فراہم کرے گا۔

اس کے علاوہ یہ بلند فضائی محاربہ مسافت اورسُپر سونک رفتار میں حساس اور پوائنٹ فائرنگ کی صلاحیت کے ساتھ منفرد مقام رکھتا ہے۔

اس موقع پر تُرک صدر نے اپنی سیاسی جماعت جسٹس اینڈ ڈویلپمنٹ پارٹی کے زیر اہتمام ریلی سے خطاب کے دوران کہا کہ ترکیہ 5ویں نسل کے لڑاکا طیاروں کی تیاری کے حوالے سے انتہائی نازک مرحلے کو پار کرچکا ہے۔آج ترکیہ کی دفاعی صنعت کا ایک اور قابل فخر دن ہے۔

انہوں نے کہا کہ، ’ہمارے قومی جنگی طیارے KAAN نے آج کامیابی کے ساتھ اپنی پہلی اڑان بھری ہے، یہ ترکیہ کا کارنامہ ہے اور ہم آئندہ بھی اسیی طرح کے کارنامے کرتے رہیں گے۔۔

انہوں نے مزید کہا کہ یترکیہ آکنجی اور کزل ایلما تیار کر چکا ہے،ہم دفاعی صنعت میں اپنی قوم کو نت نئی خوشخبریاں دیتے رہیں گے۔

کاسمیٹک سرجری کے بعد خاتون کی اسپتال سے فرار ہونے کی کوشش ناکام

اسپتال عملے کی بروقت کاروائی نے خاتون کی کوشش کو ناکام بنایا
اپ ڈیٹ 20 فروری 2024 02:24pm

ترکیہ میں غیرملکی خاتون کاسمیٹک سرجری کروا کر فرار ہوتے ہوئے پکڑی گئی، خاتون بل کی ادائیگی سے قبل اسپتال سے راہ فرار اختیار کر رہی تھی۔

یہ عجیب و غریب واقعہ ترکیہ کے شہر استنبول میں پیش آیا، جہاں ایک خاتون نے چہرے کی کاسمیٹک سرجری کے لیے اسپتال پہنچی تھی۔

میڈیا رپورٹس کے مطابق خاتون نے بل کی ادائیگی سے بچنے کے لیے یہ حرکت کی ۔

خاتون کے اسپتال سے بھاگنے کے یہ لمحات راہگیروں نے اپنے کیمرے میں محفوظ کر لیے، اسکی ویڈیو سوشل میڈیا پر جاری کی گئی تھی۔

اس مختصر کلپ میں خاتون کا چہرہ واضح طور پر سوجھا ہوا دیکھا گیا، چہرے اور گردن پر سفید پٹیاں بندھی ہوئی ہیں جس سے ظاہرہوتا ہے کہ سرجری کو تین سے چار گھنٹے ہوئے ہیں۔

جبکہ خاتون اسپتال کے لباس اور سفید چپل پہنے ہوئے اسپتال کے عملے اور نرسوں سے بحث کرتے ہوئے دیکھی گئیں، جو اسے باہر جانے سے روک رہے تھے۔

ذرائع کے مطابق خاتون کسی غیر ملک سے تعلق رکھتی ہے اور وہ ترکیہ کاسمیٹک سرجری کے لیے آئی تھی اور سرجری سے پہلے کے تمام معاملات بشمول اخراجات، ڈاکٹروں سے طے ہوچکے تھے۔ تاہم خاتون کی شہریت ظاہر کرنے سے گریز کیا گیا۔

خاتون کے فرار ہونے کی کوشش اسپتال کے عملے کی بروقت کاروائی سے ناکام بنا دی گئی۔

خطبے کے دوران ترک مساجد کے امام ہاتھ میں تلوار کیوں رکھتے ہیں؟

امام مساجد ترکیہ میں تلوار لے کر ممبر پر کھڑے ہوتے ہیں
شائع 16 فروری 2024 02:32pm

عثمانیہ سلطنت نے جہاں ترکیہ سمیت کئی ممالک میں اپنی بہادری اور بہترین حکمت عملی سے دشمن کو منہ توڑ جواب دیا وہیں ترکیہ میں ان کی چند ایسی روایتیں بھی ہیں جو کہ سب کو حیران کر دیتی ہیں۔

ترکیہ میں آج بھی امام مسجد نماز جمعہ کے خطبے کے دوران تلوار لے کر کھڑا ہوتا ہے۔

عثمانیہ روایت کو برقرار رکھتے ہوئے ترکیہ کے مساجد کے امام تلوار کو آج بھی اپنے پاس رکھتے ہیں، ترکیہ کے امام اس روایت کو اس لیے برقرار رکھتے ہیں تاکہ فاتح سلطان محمت کو خراج عقیدت پیش کر سکیں۔

جبکہ ترک روایت کے عین مطابق اگر عثامنیہ سلطنت کا امیر شہر فتح کرتا ہے تو امام مسجد پر یہ لازم ہوتا ہے کہ وہ دوران خطبہ تلوار کو ظاہر کرے، دراصل اس عمل سے اس بات کی نشاندہی کرنا ہوتی ہے کہ اس شہر کو مسلمانوں نے فتح کیا ہے۔

دوسری جانب ترکیہ کے مذہبی افئیرز کے صدر پروفیسر ڈاکٹر علی اربش کی جانب آیا صوفیہ سے میں پہلی بار جمعے کی نماز کے موقع پر بھی تلوار ہاتھ میں لی ہوئی تھی۔

چین کے بعد ترکی، روس اور افغانستان نے بھی تحمل کی اپیل کردی

پاکستان اور ایران کے درمیان حالیہ پر تشدد واقعات خطرناک ہیں، افغان وزارت خارجہ
شائع 18 جنوری 2024 07:16pm

پاکستان اور ایران کے درمیان ہونے والی کشیدگی کے بعد روس، چین، ترکیہ اور افغاستان کی جانب سے بھی ردعمل سامنے آیا ہے، جس میں دونوں ممالک سے تحمل کا مظاہرہ کرنے پر زور دیا گیا ہے۔

روس

پاک ایران کشیدگی پر روس نے پاکستان اور ایران سے تحمل سے کام لینے پر زور دیتے ہوئے کہا ہے کہ صورتحال میں مزید کشیدگی خطے کے امن و استحکام اور سلامتی میں دلچسپی نہ رکھنے والوں کے ہاتھوں میں کھلونا بنے گی۔

ماسکو میں پریس بریفنگ کے دوران ترجمان روسی وزارت خارجہ ماریا زخارروا کا کہنا تھا کہ ایس سی او کے دوست ممالک کے درمیان کشیدگی ہونا افسوسناک بات ہے، دونوں ممالک سے روس کے شراکتی تعلقات فروغ پا رہے ہیں۔

ترجمان روسی وزارت خارجہ کا کہنا تھا کہ صورتحال میں مزید کشیدگی خطے کے امن و استحکام اور سلامتی میں دلچسپی نہ رکھنے والوں کے ہاتھوں میں کھلونا بنے گی۔

ترجمان کا مزید کہنا تھا کہ دوسرے ملک میں انسداد دہشت گردی کارروائی اس ملک کی انتظامیہ کے تعاون اور معاہدے کے تحت ہونی چاہیئے، فریقین سے تحمل سے کام لیں اور مسائل کو سیاسی و سفارتی ذرائع سے حل کریں۔

چین

چین نے پاکستان اور ایران کے درمیان ثالثی کا کردار ادا کرنے کے لیے پیش کش کردی۔

وزارت خارجہ کی ترجمان ماؤ ننگ نے بریفنگ کے دوران کہا چین کو امید ہے کہ دونوں فریق تحمل کا مظاہرہ کریں گے اورباہمی تعلقات مزید کشیدہ ہونے روکیں گے۔ اگر دونوں فریق چاہیں تو چین دونوں ممالک کے درمیان ثالثی کا کردار ادا کرنے کیلئے تیار ہے۔

قبل ازیں گزشتہ روز بھی چین نے پاکستان کی حدود میں ایران حملوں پر ردعمل میں دونوں ممالک سے تحمل کا مظاہرہ کرنے اور امن و امان قائم رکھنے کا مطالبہ کیا تھا۔

چینی وزیر خارجہ کے ترجمان ماؤ ننگ نے بریفنگ کے دوران کہا چین دونوں فریقوں سےتحمل کا مظاہرہ کرنے،کشیدگی میں اضافے کا باعث بننے والے اقدامات سے گریز کرنے اورامن و استحکام کو برقرار رکھنے کے لیے مل کرکام کرنے کا مطالبہ کرتا ہے۔

افغانستان اور ترکیہ

پاکستان ایران کشیدگی پر افغانستان اور ترکیہ نے دونوں ممالک سے تحمل کا مظاہرہ کرنے پر زور دیا ہے۔

غیر ملکی خبر رساں ایجنسی کے مطابق افغان وزارت خارجہ کی جانب سے بیان میں کہا گیا ہے کہ پاکستان اور ایران کے درمیان حالیہ پر تشدد واقعات خطرناک ہیں، طویل جنگوں کے بعد خطے میں امن واستحکام آیا ہے۔

افغان وزارت خارجہ نے کہا ہے کہ پاکستان، ایران کو تنازعات سفارت کاری سے حل کرنے چاہئیں۔

دوسری جانب پاکستان ایران کشیدگی پر ترکیے نے بھی دونوں ممالک سے تحمل اور عقلمندی کا مظاہرہ کرنے پر زور دیا ہے۔

ترک وزیر خارجہ حاقان فیدان کا کہنا ہے کہ پاکستان اور ایران کے وزرائے خارجہ سے ٹیلیفون پر بات کی ہے، ایران اور پاکستان دونوں ہی خطے میں کشیدگی بڑھانا نہیں چاہتے۔ انہوں نے کہا کہ ترکیے کی تجویز ہے کہ فریقین مزید کشیدگی نہ بڑھائیں، جلد از جلد امن بحال کریں۔

ترک وزارت خارجہ سے جاری بیان میں بھی کہا گیا ہے کہ خودمختاری اور علاقائی سالمیت کے باہمی احترام کی بنیاد پر مسائل کو حل کیا جانا چاہیے۔ اس سے قبل پاک ایران کشیدگی پر روس نے پاکستان اور ایران سے تحمل سیکام لینے پر زور دیتے ہوئے کہا تھا کہ صورتحال میں مزیدکشیدگی خطیکے امن و استحکام اور سلامتی میں دلچسپی نہ رکھنے والوں کے ہاتھوں میں کھلونا بنے گی۔

ادھر ترکیہ کے وزیر خارجہ نے پاکستانی اور ایرانی ہم منصب سے ٹیلی فونک رابطہ کیا اور کہا کہ پاکستان اور ایران کشیدگی کو میزید نہ بڑھائیں، امن کو بحال کریں۔

بھارت سے کشیدگی کے بعد مالدیپ نے ترکیہ سے اہم فوجی معاہدہ کرلیا

مالدیپ نے ترکیہ کے ساتھ 37 ملین ڈالر کے فوجی ڈرون خریدنے کے معاہدے پر دستخط کیے
شائع 17 جنوری 2024 09:39pm
تصویر بشکریہ ٹیلی گرام
تصویر بشکریہ ٹیلی گرام

بھارت سے کشیدگی کے بعد مالدیپ نے ترکیہ کے ساتھ گہرے سمندر میں گشت کرنے والے ڈرون طیاروں کا معاہدہ کرلیا ہے۔

مالدیپ نے ترکیہ کے ساتھ 37 ملین ڈالر کے فوجی ڈرون خریدنے کے معاہدے پر دستخط کیے ہیں۔ یہ فوجی ڈرون مالدیپ کے گہرے سمندروں میں فضائی نگرانی کیلئے گشت کریں گے۔ ماضی میں اس حوالے سے بھارت نے مالدیپ کی دفاعی افواج کے ساتھ شراکت قائم کر رکھی تھی۔

ان ڈورنز نے مالدیپ کی فوج کی جانب سے مشکوک بحری جہازوں، اسلحہ و منشیات کی اسمگلنگ کے خلاف جاسوسی پروازیں کیں۔ ان کی جگہ اب ترک ڈرونز لے لیں گے۔

واضح رہے کہ ترکیہ سے فوجی ڈرون کا معاہدہ ایسے وقت میں کیا جارہا ہے جب حال ہی میں مالدیپ کے صدر ڈاکٹر محمد معیزو نے اپنے ملک سے بھارت کو فوج نکالنے کیلئے 15 مارچ کی ڈیڈ لائن دی تھی۔

میڈیا رپورٹ کے مطابق مالدیپ حکومت نے 77 بھارتی فوجی اہلکاروں کو ملک چھوڑنے کی ڈیڈ لائن دی تھی۔

ڈاکٹر محمد معیزو گزشتہ سال کے آخر میں مالدیپ کے صدر منتخب ہوئے، وہ اپنے ملک سے بھارت کا اثر و رسوخ ختم کرنے کے خواہاں ہیں، اپنی انتخابی مہم کے دوران بھی وہ بھارت مخالف بیان بازی کرتے تھے اور انھوں نے ”انڈیا آؤٹ“ مہم کو لیڈ کیا تھا۔

مالدیپ کے صدر نے عہدہ سنبھالنے کے بعد بھارت کے ساتھ تعلقات کو کم کرنے اور چین کے ساتھ روابط بڑھانے کا اعلان کیا تھا۔

خیال رہے کہ گزشتہ دنوں مالدیپ کے ایک وزیر کی جانب سے وزیر اعظم نریندر مودی کے مالدیپ کے سیاحتی دورے کو جواز بناکر ان کے بارے میں توہین آمیز تبصرہ بھی کیا تھا۔ جس کے بعد دونوں ممالک کے درمیان سفارتی تعلقات مزید کشیدہ ہوگئے تھے۔

یاد رہے کہ

پاکستان، ترکیہ اور سعودی عرب کا فوجی ٹیکنالوجی میں تعاون پر تبادلہ خیال

مشترکہ مقاصد کے حصول کے لئے تعاون کی کوششوں کو تیز کرنے کی ضرورت پر زور
شائع 10 جنوری 2024 04:59pm
فوٹو ــ فائل / کراچی میں منعقدہ بین الاقوامی دفاعی نمائش آئیڈیاز 2022
فوٹو ــ فائل / کراچی میں منعقدہ بین الاقوامی دفاعی نمائش آئیڈیاز 2022

پاکستان، ترکیہ اور سعودی عرب نے فوجی ٹیکنالوجی میں تعاون پر تبادلہ خیال ہے۔ تینوں ملکوں نے مشترکہ مقاصد کے حصول کے لئے تعاون کی کوششوں کو تیز کرنے کی ضرورت پر زور دیا ہے۔

پاکستان کے انگریزی اخبار کے مطابق پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ پاکستان، ترکی اور سعودی عرب کے درمیان فوجی تعاون بڑھانے کے حوالے سے اہم اقدامات پر تبادلہ خیال کیا گیا۔

یہ بات چیت سہ فریقی دفاعی صنعتی تعاون کے دوسرے اجلاس میں ہوئی، یہ اجلاس راولپنڈی میں جنرل ہیڈ کوارٹرز میں منعقد کیا گیا تھا۔ یہ فورم تینوں ممالک کے درمیان دفاع کے شعبے میں تعاون بڑھانے کے لئے قائم کیا گیا تھا۔

پاک فوج کے شعبہ تعلقات عامہ (آئی ایس پی آر) کا کہنا ہے کہ اجلاس میں تحقیق اور ترقی سمیت دفاعی سازوسامان کی ٹیکنالوجی میں ممکنہ تعاون پر تبادلہ خیال کرنے کا موقع فراہم کیا گیا۔

تینوں ممالک نے مشترکہ مقاصد کے حصول اور دفاعی شعبے میں خود کفالت کے حصول کے لئے دانشورانہ، تکنیکی، مالی اور انسانی وسائل کو یکجا کرنے کی اہمیت پر زور دیا۔ انہوں نے اپنے تاریخی تعلقات کا اعتراف کیا اور سہ فریقی تعاون کے دائرہ کار کو وسعت دینے کے اپنے اسٹریٹجک ارادے کا اعادہ کیا۔ مشترکہ مقاصد کے حصول کے لئے تعاون کی کوششوں کو تیز کرنے کی ضرورت سمیت دفاعی شعبے میں خود کفالت کے حصول کیلئے وسائل جمع کرنے پر زور دیا گیا۔

تینوں فریقین نے ورلڈ ڈیفنس شو کے موقع پر سہ فریقی دفاعی صنعتی تعاون پر اگلا اجلاس منعقد کرنے کا عزم کیا۔ ورلڈ ڈیفنس شو فروری 2024 میں سعودی عرب کے دارالحکومت ریاض میں شیڈول ہے۔

شدید افراطِ زر سے ترکیہ کا برا حال، حکومت کم از کم اجرت میں 49 فیصد اضافے پر مجبور

رواں سال کے اوائل میں بھی 26 فیصد اضافہ کیا تھا، ایک تہائی ترک باشندے کم از کم اجرت کی سطح پر زندگی بسر کر رہے ہیں
شائع 29 دسمبر 2023 08:27am

ترکیہ کی حکومت نے غیر معمولی افراطِ زر کا مقابلہ کرنے کے لیے کم از کم اجرت میں 49 فیصد اضافے کا فیصلہ کیا ہے۔ اس وقت ترکیہ میں افراطِ زر کی شرح 62 فیصد تک پہنچ چکی ہے۔

ترکیہ کی معیشت کو دو سال قبل کرنسی کے غیر معمولی بحران کا سامنا کرنا پڑا تھا۔ امریکہ اور یورپ کے بعض اقدامات کے نتیجے میں ترکیہ کی کرنسی لیرا پر شدید دبائو مرتب ہوا تھا۔ ڈالر اور دیگر مغربی کرنسیوں کے مقابلے میں لیرا کی گرتی ہوئی قدر کو بلند کرنے کے لیے ترکیہ کی حکومت نے مختلف مراحل میں شرحِ سود 40 فیصد تک بڑھائی ہے۔

ترکیہ کے وزیر محنت ویدات اسیکھان نے میڈیا کے نمائندوں کو بتایا کہ ترکیہ کو دو سال کے دوران 25 سال کے شدید ترین کرنسی بحران کا سامنا کرنا پڑا ہے۔ اس کے نتیجے میں ترکیہ کی معیشت کو الجھنیں درپیش رہی ہیں۔ لیرا کی قدر میں نصف کی حد تک رونما ہونے والی کمی سے عوام کو بھی مشکلات جھیلنا پڑی ہیں۔

ترکیہ کے مرکزی بینک نے چند ماہ کے دوران شرحِ سود میں مجموعی طور پ 42 فیصد تک اضافہ کیا ہے۔ معیشتی خرابی سے عوام کا معیارِ زندگی بھی متاثر ہوا ہے۔ حکومت نے رواں سال کے اوائل میں کم از کم اجرت میں 25 فیصد اضافہ کیا تھا۔ اب پھر کم از کم اجرات بڑھائی جارہی ہے تاکہ لوگ ڈھنگ سے جینے کے قابل ہونے میں دشواری محسوس نہ کریں۔

ترکیہ کی آبادی 8 کروڑ 60 لاکھ ہے۔ ایک تہائی ترک کم از کم اجرت کی سطح پر زندگی بسر کر رہے ہیں۔ حکومت ان کے لیے بعض معاملات میں زرِ اعانت کا انتظام بھی کرتی ہے تاکہ وہ معیاری انداز سے جی سکیں۔

ترکیہ میں 5.5 شدت کا زلزلہ

جمعرات کو مشرقی ترکیہ کے علاقے میں 5.5 شدت کا زلزلہ آیا۔
شائع 28 دسمبر 2023 02:55pm

مشرقی ترکیہ میں آئے 5.5 شدت کے تازہ زلزلے نے ملک کے کئی علاقوں کو جھنجھوڑ دیا۔

یورپی میڈیٹیرینین سیسمولوجیکل سینٹر (EMSC) نے بتایا کہ جمعرات کو مشرقی ترکیہ کے علاقے میں 5.5 شدت کا زلزلہ آیا۔

زلزلہ پیما مرکز کے مطابق زلزلے کی گہرائی 9.4 کلومیٹر ریکارڈ کی گئی۔

مزید تفصیلات کا انتظار ہے۔۔۔

پاکستان اور ترکیہ کا مشترکہ ففتھ جنریشن اسٹیلتھ فائٹر آئندہ ماہ پہلی پرواز کرے گا

پہلا ففتھ جنریشن ”ٹی ایف ایکس“ طیارہ 2030 میں پاک فضائیہ شامل کیا جائے گا۔
شائع 22 نومبر 2023 04:23pm

پاکستان اور ترکیہ کے مشترکہ ففتھ جنریشن فائٹر جیٹ پروگرام میں اہم پیشرفت ہوئی ہے، ذرائع کے مطابق پاک ترک ففتھ جنریشن ”ٹی ایف ایکس“ فائٹر جیٹ کی آئندہ ماہ پہلی پرواز کی تیاریاں کی جا رہی ہیں۔

ذرائع کا کہنا ہے کہ شیڈول کے مطابق ٹی ایف ایکس فائٹر جیٹ کی آئندہ ماہ پہلی پرواز طے ہے۔

پاکستان ترکیہ کے ساتھ ففتھ جنریشن اسٹیلتھ ائیر سپیریوریٹی فائٹر جیٹ منصوبے پر کام کر رہا ہے، پاکستان ترک ایرو اسپیس انڈسٹری کے ”ٹی ایف ایکس“ طیارے کے پروگرام کا باضابطہ حصہ بن چکا ہے۔

”ٹی ایف ایکس“ طیارے نے رواں برس اپنی پہلی ٹیکسی کی تھی۔

شیڈول کے مطابق پاک فضائیہ میں پہلا ففتھ جنریشن طیارہ 2030 میں شامل کیا جائے گا۔

ترک ایرو اسپیس انڈسٹری کے ”ٹی ایف ایکس اسٹیلتھ طیارے“ میں امریکی ساختہ جنرل الیکٹرک ایف ون ٹین انجن استعمال کئے جائیں گے۔

امریکا کے اعتراض کی صورت میں پاکستان کے پاس برطانوی ساختہ رولز رائس انجن کا آپشن بھی موجود ہے۔

ترک کمپنی برطانیہ کی رولز رائس کمپنی کے ساتھ مل کر نئے انجن کی تیاری پر بھی کام کر رہی ہے۔

پاک ترک ففتھ جنریشن طیارہ 21 میٹر طویل ہے اور اس کے پروں کا پھیلاؤ 14 میٹر تک ہوگا۔

طیارے کا ٹیک آف وزن 27 ہزار 215 کلو گرام ہوگا اور اس کی زیادہ سے زیادہ رفتار ماک 1.8 جبکہ کومبیٹ رینج 1100 کلومیٹر ہوگی۔

ٹی ایف ایکس طیارے کی سروس سیلنگ 55 ہزار فٹ تک ہو گی۔

پاکستان ترکیہ کے ساتھ نہ صرف ففتھ جنریشن اسٹیلتھ فائٹر جیٹ بلکہ بغیر پائلٹ کے فضائی پلیٹ فارمز کی بھی مشترکہ پیداوار پر بھی کام کر رہا ہے۔

دو اگست 2023 کو کراچی میں ملجم کلاس کورویٹ کی لانچنگ پر ترک نائب وزیر دفاع جلال سمیع توفیقچی نے ٹی ایف ایکس پراجیکٹ پر باضابطہ بات چیت کا اعلان کیا تھا۔

ترک نائب وزیر دفاع کے مطابق 200 کے قریب پاکستانی ماہرین پہلے ہی ٹی ایف ایکس پراجیکٹ کا حصہ بن چکے ہیں۔

ترک ایرو اسپیس کے سی ای او نے فروری 2022 میں ہی ٹی ایف ایکس کو پاک ترک فائٹر پروگرام قرار دیا تھا۔

پاکستان اور ترکیہ دہائی کے آخر میں اپنے ایف سکسٹینز کو فیز آؤٹ کرنا چاہتے ہیں اور انہیں ٹی ایف ایکس فائٹر جیٹس سے بدلنے کے خواہاں ہیں۔

پاک فضائیہ کا نیشنل ایرو اسپیس سائنس اینڈ ٹیکنالوجی پارک ٹی ایف ایکس پراجیکٹ میں متحرک کردار ادا کرے گا۔

ترک وزیراعظم کی اسرائیل کو سنگین دھمکی پر انقرہ سے صہیونی سفارتی عملہ واپس طلب

اسرائیل کو جنگی مجرم بنا کر پیش کرینگے، کیا مغرب پھر ہلال و صلیب کی جنگ شروع کر رہا ہے، اردوگان کا ریلی سے خطاب
اپ ڈیٹ 29 اکتوبر 2023 10:03am
ترک صدر رجب طیب ایردوآن نے ہفتے کے روز کہا کہ ترکی اسرائیل کو دنیا کے سامنے جنگی مجرم کے طور پر متعارف کرائے گا۔
ترک صدر رجب طیب ایردوآن نے ہفتے کے روز کہا کہ ترکی اسرائیل کو دنیا کے سامنے جنگی مجرم کے طور پر متعارف کرائے گا۔

اسرائیل نے ترکی سے اپنے سفارتی عملے کو واپس طلب کرلیا، اردوگان نے کہا کہ اسرائیل کو جنگی مجرم بنا کر پیش کریں گے۔

غیرملکی میڈیا کے مطابق مذکورہ فیصلے سے دونوں ممالک کے تعلقات کو دھچکا لگا ہے، جنہوں نے صرف گزشتہ سال ہی سفیروں کی دوبارہ تقرری پر اتفاق کیا تھا۔

اسرائیلی وزیرخارجہ ایلی نے سوشل میڈیا پر اپنے بیان میں کہا کہ ترکی کے سنگین بیانات کے پیش نظر وہاں سفارتی نمائندوں کی واپسی کا حکم دیا ہے۔ انہوں نے واضح کیا کہ اسرائیل اور ترکی کے درمیان تعلقات کا از سر نو جائزہ لیا جائے گا۔

دوسری جانب ترک صدر رجب طیب اردوگان نے ہفتے کے روز کہا کہ ترکی اسرائیل کو دنیا کے سامنے جنگی مجرم کے طور پر متعارف کرائے گا۔

استنبول میں فلسطین کے حق میں ایک ریلی سے خطاب کرتے ہوئے اردگان نے کہا کہ ہم اسرائیل کو بھی دنیا کے سامنے جنگی مجرم قرار دیں گے، ہم اس کے لیے تیاری کر رہے ہیں۔

اردوگان نے زور دے کر کہا کہ مغربی دنیا نے اپنے سیاست دانوں اور میڈیا کو غزہ میں بے گناہ لوگوں کے قتل عام کو جائز قرار دینے کے لیے متحرک کیا اور اسرائیل جنگی جرائم کا ارتکاب کر رہا ہے۔

ترک صدر نے کہا کہ یوکرین روس جنگ میں مارے جانے والے شہریوں کے لیے مگرمچھ کے آنسو بہانے والے غزہ میں ہزاروں معصوم بچوں کی ہلاکتوں کو خاموشی سے دیکھ رہے ہیں۔

 فوٹو: اے ایف پی
فوٹو: اے ایف پی

انہوں نے کہا کہ میں مغرب سے پوچھ رہا ہوں، کیا آپ صلیبی جنگ کا ایک اور ماحول بنانا چاہتے ہیں؟ غزہ میں ہونے والے قتل عام کے پیچھے اصل مجرم مغرب ہے۔

ترک صدر نے کہا کہ بے شک ہر ملک کو اپنے دفاع کا حق ہے لیکن انصاف کہاں ہے؟ کوئی دفاع نہیں بلکہ غزہ میں قتل عام کیا جارہا ہے، ہر کوئی جانتا ہے کہ اسرائیل خطے کا ایک پیادہ ہے، جو وقت آنے پر قربان ہو جائے گا۔

انہوں نے مزید کہا کہ یقیناً آگ اور خون کے اس ماحول میں افسوسناک واقعات رونما ہوئے ہیں تاہم ان میں سے کوئی بھی ایسی مہم کے لیے بہانہ نہیں بن سکتا جس کا مقصد فلسطینی عوام کی جانب سے مختلف ناموں سے چلائی جانے والی مزاحمت کو بدنام کرنا ہے۔

اردوگان نے کہا کہ میں نے کہا کہ حماس دہشت گرد تنظیم نہیں ہے اور اسرائیل اس سے بہت پریشان تھا، خطے میں کھیلے جانے والے کھیل کے اصل مالک وہ ہیں، جو اسرائیلی حکومت کی خواہشات کی حمایت کرتے ہیں کیونکہ اسرائیل ان کے بغیر ایک قدم بھی نہیں اٹھا سکتا۔

مزید پڑھیں

غزہ: اسرائیلی فوج کی زمینی کارروائیاں، حماس کے 150زیر زمین ٹھکانوں کو تباہ کردیا گیا

ایلون مسک کا اسٹار لنک کے ذریعے غزہ میں انٹرنیٹ فراہم کرنے کا اعلان

فلسطین اسرائیل جنگ کے درمیان تربوز کا انوکھا کردار

ترک صدرنے کہا کہ کیا مغرب ایک بارپھر صلیب اور ہلال کی جنگ چاہتا ہے، اگر مغرب نے ایسی کوشش کی، تو جان لےکہ یہ قوم ابھی مری نہیں ہے، ترکی کے لوگ ابھی زندہ ہیں۔

واضح رہے کہ صہیونی فوج فضائی اور زمینی کارروائیاں کرتے ہوئے حماس کے 150 زیر زمین ٹھکانے تباہ کرنے اور حماس کے سربراہ ائر آپریشن سمیت متعدد کارکنوں کو شہید کرنے کا دعویٰ کیا ہے۔

حماس نے بھی اسرائیلی فوج پر جوابی حملے شروع کردیے اور کئی حملوں کو پسپا کردیا گیا، جس کے نیتجے میں صہیونی فورسز کو بھاری نقصان اٹھانا پڑا ہے۔

انٹرنیٹ پر مگرمچھ فروخت کرنے والا شخص گرفتار

ترکیہ کے قانون کے مطابق اس قسم کے جانوروں کی پرورش گھروں میں ممنوع ہے
شائع 25 اکتوبر 2023 05:21pm
تصویر:  TGRTHABER
تصویر: TGRTHABER

جانوروں سے محبت ایک فطری عمل ہے اور بہت سے لوگ اس شوق کی خاطر خطرناک قسم کے جانداروں کو بھی سدھا لیتے ہیں، جبکہ کچھ لوگ اپنی روزی کی خاطر ایسا کرنے پر مجبور ہوتے ہیں۔

رواں مہینے استنبول میں پولیس نے ایک ترک شخص کو اپنے گھر میں خطرناک جاندار کی پرورش کرنے کے الزام میں حراست میں لیا تھا۔

اس شخص پر خطرناک جانوروں کو مقامی قانون کے خلاف گھر میں رکھنے پر بھاری جرمانہ عائد کیا گیا تھا۔

ترکیہ کے قانون کے مطابق اس قسم کے جانوروں کی پرورش گھروں میں ممنوع ہے۔

اسٹیٹ پولیس کے مطابق ترک شہری مگرمچھوں کی پرورش اور ان کی انٹرنیٹ پر فروخت میں ملوث تھا اور اب اس سے استنبول پولیس کے انسداد اسمگلنگ کرائمز ڈائریکٹوریٹ میں زیرحراست تفتیش کی جارہی ہے۔

کیونکہ ترکیہ کے قانون کے مطابق اس طرح کے جانداروں کی خرید و فروخت قابل سزا ہے۔

مزید پڑھیں

مگرمَچھوں نے اپنے ہی مالک کا شکار کرکے بُھوک مٹالی

سونے کی اینٹیں، مگرمچھ، اور بھیس بدلنے کا سامان، حکام کو یوگینی کے گھر سے کیا کچھ ملا؟

میئرنے عوام کی قسمت بدلنے کیلئے مگرمچھ سے شادی کرلی

ترکیہ اسٹیٹ پولیس کے مطابق شہری کے گھر سے 3 چھوٹے مگرمچھ ملے ہیں۔

پولیس کو اطلاع ملی تھی کہ یہ شہری اپنے گھر میں خطرناک رینگنے والے جانوروں کی پرورش کر رہا ہے اور ان کی تجارت بھی کر رہا ہے۔

ترک شہری دونوں چھوٹے مگرمچھ اتاشیر کے علاقے میں اپنے گھر میں پال رہا تھا اور انہیں انٹرنیٹ پر فروخت کے لیے پیش کر رہا تھا۔

انہوں نے حراست میں لیے گئے مشتبہ شخص کے خلاف ”اسمگلنگ قانون نمبر 5607 کی خلاف ورزی“ اور ”سی آئی ٹی ای ایس کنونشن کی خلاف ورزی“ کے الزامات پر کارروائی کا آغاز کیا ہے۔

امکان ہے ملزم کو انسداد اسمگلنگ قانون کے تحت قید اور جرمانے کا سامنا کرنا پڑ سکتا ہے۔

سکیورٹی ٹیموں نے جانوروں کے ڈاکٹر کی جانچ پڑتال کے بعد خطرناک رینگنے والے جانوروں کو ڈائریکٹوریٹ آف نیچر کنزرویشن اینڈ نیشنل پارکس کے حوالے کر دیا۔

جنگ بندی کرانے کیلئے امریکا نے ترکیہ اور سعودی عرب سے مدد مانگ لی

اسرائیل پر حملوں میں ایران کے ملوث ہونے کے کوئی شواہد نہیں ملے، انٹونی بلنکن
شائع 09 اکتوبر 2023 08:52am
فوٹو — فائل
فوٹو — فائل

حماس اور اسرائیل کے درمیان جاری جنگ کے خاتمے کے لئے امریکا نے ترکیہ اور سعودی عرب سے مدد مانگ لی۔

ایکس پر امریکی سیکرٹری خارجہ انٹونی بلنکن نے لکھا کہ میں نے ترک وزیر خارجہ سے حماس کے اسرائیل پر حملوں پر بات کی، اس دوران جنگ بندی اور حماس کے زیر حراست تمام یرغمالیوں کی فوری رہائی کے لئے ترکیہ کی وکالت کی حوصلہ افزائی کی۔

اس کے علاوہ انٹونی بلنکن نے سعودی وزیر خارجہ شہزادہ فیصل بن فرحان السعود اور متحدہ عرب امارات (یو اے ای) کے وزیر خارجہ شیخ عبداللہ بن زید النہیان سے بھی ٹیلی فونک رابطہ کیا۔

انٹونی بلنکن کے ترجمان کی جانب سے جاری کردہ بیان کے مطابق امریکا کے اعلیٰ سفارت کار نے اسرائیل کے اپنے دفاع کے حق کا اعادہ کیا جب کہ یو اے ای اور سعودی عرب کو رابطے جاری رکھنے کی ترغیب دی۔

دوسری جانب انٹونی بلنکن نے ایک بیان میں واضح کیا کہ اسرائیل پر حملوں میں ایران کے ملوث ہونے کے کوئی شواہد نہیں ملے، البتہ حماس کا یہ حملہ اسرائیل کے ساتھ سعودی عرب کے بڑھتے تعلقات میں خلل ڈالنے کی کوشش ہوسکتا ہے۔

امریکی سیکرٹری خارجہ نے حماس کے اسرائیل پر حملوں کو روکنے اور تمام یرغمالیوں کی رہائی کے لیے امریکا کی غیر متزلزل توجہ کو بھی اجاگر کیا۔

واضح رہے کہ ہفتے سے اسرائیلی قصبوں پر فلسطینی جنگجوؤں کے برسوں میں ہوئے سب سے سنگین حملے میں ایک کرنل سمیت کم از کم 700 اسرائیلی ہلاک اور 2156 زخمی ہوچکے جب کہ اسرائیل کی غزہ پر جوابی بمباری میں 600 سے زائد فلسطینی شہید اور دو ہزار سے زائد زخمی ہیں۔

ادھر اسرائیل فلسطین کشیدگی پر غور کے لیے طلب کیے جانے والا اقوام متحدہ کی سلامتی کونسل کا اجلاس بغیر کسی نتیجے کے ختم ہوگیا۔

یہ بھی پڑھیں:

1967 سے پہلے کی سرحدوں پر فلسطینی ریاست، اسرائیل پر پاکستان کی واضح پوزیشن سامنے آگئی

امریکا کا اپنا بحری بیڑہ اسرائیل کے نزدیک بھیجنے کا اعلان

اجلاس میں کسی قرارداد پر اتفاق رائے نہ ہوسکا، امریکا کی جانب سے اجلاس میں اتفاق رائے نہ ہونے پر اظہار افسوس کیا گیا ہے۔

ڈرامہ ’کورولس عثمان‘ کے عثمان غازی کا پاکستان آنے کا اعلان، لیکن کیوں؟

‘وہ رواں ماہ اکتوبر میں پاکستان آرہے ہیں’
اپ ڈیٹ 04 اکتوبر 2023 07:19pm
فوٹو فائل
فوٹو فائل

اسلامی فتوحات پر مبنی دنیا بھر میں مقبولیت حاصل کرنے والی مشہور ترک ڈراما سیریز ”کورولس عثمان“ میں مرکزی کردار ادا کرنے والے تُرک اداکار بوراک اوزچیوت نے پاکستان میں اپنے مداحوں کو خوشخبری سنا دی۔

تُرک اداکار بوراک اوزچیوت نے اپنے پاکستانی مداحوں کو خوشخبری دینے کے لیے فوٹو اینڈ ویڈیو شیئرنگ ایپ انسٹاگرام اور ایکس کا سہارا لیا۔

بوراک اوزچیوت نے اپنی ایکس پر جاری ویڈیو میں بتایا کہ ’وہ رواں ماہ اکتوبرمیں پاکستان آرہے ہیں‘۔

اداکار نے پاکستان آنے کی وجہ بتاتے ہوئے کہا کہ ’وہ پاکستانی نجی پرفیوم برانڈ کے برانڈ ایمبیسڈر کی حیثیت سے پرفیوم کی لانچ پر پاکستان آئیں گے‘۔

براک کا ویڈیو پیغام سوشل میڈیا پروائرل ہونے کے بعد صارفین نے خوشی کا اظہار کیا ہے۔

سیریز کے مداحوں نے انہیں اپنے شہروں کا دورہ کرنے کی دعوت بھی دی۔

مزید پڑھیں

ترکش ڈرامے ارطغرل غازی کے کردار ’دوآن الپ‘ پاکستان پہنچ گئے

انوشکا اور ویرات کوہلی کا مفت ٹکٹ مانگنے والوں کو زبردست مشورہ

میرا شہزادہ سلیم، ماہرہ نے شادی کی ویڈیو پوسٹ کردی

اس سے قبل اسی ترک سیریز سے ”ارطغرل غازی“ کے مرکزی کردار ارطغرل غازی، ترگت الپ اور بامسی الپ بھی مذکورہ پرفیوم برانڈ کے ایمبیسڈر کی حیثیت سے پاکستان آ چکے ہیں۔

بوراک اوزچیوت نے سلطنتِ عثمانیہ کے بانی عثمان غازی کی زندگی پر مبنی تاریخی سیریز ’ارطغرل غازی‘ کے ’کورولس عثمان‘ کے مرکزی کردار سے دنیا بھر میں شہرت حاصل کی۔

ترکیہ میں اب پارلیمنٹ بند اور بغاوتیں کامیاب نہیں ہوتیں، اردوان

دہشت گرد ترکیہ میں اپنے مقاصد کبھی حاصل نہیں کر سکیں گے، ترک صدر
شائع 01 اکتوبر 2023 07:44pm
ترک صدر رجب طیب اردوان اتوار کو پارلیمنٹ سے خطاب کر رہے ہیں (تصویر: اے ایف پی)
ترک صدر رجب طیب اردوان اتوار کو پارلیمنٹ سے خطاب کر رہے ہیں (تصویر: اے ایف پی)

ترکیہ کے صدر رجب طیب اردوان کا کہنا ہے کہ ترکیہ میں اب نہ تو پارلیمنٹ بند ہوتی ہے اور نہ ہی بغاوتیں کامیاب ہوتی ہیں۔

صدر اردوان نے وزارت داخلہ کے قریب خودکش حملے کے کچھ دیر بعد پارلیمانی اجلاس میں شرکت کی، جو اس پارلیمنٹ بلڈنگ میں منعقد کیا گیا تھا جو دھماکے کی جگہ سے کچھ ہی دور تھی۔

پارلیمنٹ سے اپنے خطاب میں صدر اردوان نے کہا کہ دہشت گرد ترکیہ میں اپنے مقاصد کبھی حاصل نہیں کر سکیں گے۔

انہوں نے کہا کہ ’انقرہ میں آج ہوئی دہشت گردی کی کارروائی، جس میں پولیس کی بروقت مداخلت کی بدولت دو مجرموں کو ختم کر دیا گیا، دہشت گردی کی آخری لہر ہے۔‘

ان کا کہنا تھا کہ امن اور شہریوں کی سلامتی کو تباہ کرنے کی کوشش کرنے والے دہشت گرد کبھی کامیاب نہیں ہوں گے۔

صدر اردوان نے کہا کہ اب ہم ایسے ملک میں نہیں رہتے جہاں پارلیمنٹ بند ہوئی اور بغاوتیں ہوئیں، ہمارا نیا فرض اس بات کو یقینی بنانا ہے کہ ہمارے پاس ایک نیا سویلین آئین ہو۔

بچوں کونشہ آور اشیاء پلانے، ریپ کیلئے تیار کرنے والا تُرک ڈاکٹر گرفتار

ملزم ماہر تعلیم بھی ہے، واقعے نے ترکیہ کو ہلا کر رکھ دیا
شائع 18 ستمبر 2023 03:02pm
تصویر/ فائل
تصویر/ فائل

ترکیہ میں پیش آنے والے واقعے نے پورے ملک کو ہلا کر رکھ دیا ہے، ایک ڈاکٹر کواس الزام میں گرفتار کیا گیا ہے کہ وہ اپنے کلینک میں بچوں کو نشہ آور اشیاء پلانے سمیت متعدد جرائم سرانجام دیتا تھا۔

ڈاکٹرپر الزام ہے کہ وہ بچوں کو نشہ کراکے انہیں ان کے ہی خاندان کے دیگر افراد سے ریپ کرنے پراکساتا، انہیں نفسیاتی طور پر کمزور کرنے کے ساتھ ہی فتح گولن کی تحریک میں بھرتی کرنے کی کوشش کرتا تھا۔

العریبیہ میں شائع رپورٹ کے مطابق ترک ڈاکٹرکی ان حرکتوں سے پردہ فاش کرتے ہوئے پانچ بچوں کی شکایات سامنے آئیں، جس پر حکام نے کارروائی کرتے کرتے ہوئے ڈاکٹر کو حراست میں لے لیا۔

ملزم ڈاکٹر کی شناخت سلیمان کے نام سے ہوئی ہے، جوایک ماہر تعلیم بھی ہے اور استنبول کی ایک پبلک یونیورسٹی میں لیکچرار تھا، جس کو جولائی 2016 کے وسط میں ہونے والی رجب طیب اردگان حکومت کے خلاف بغاوت کی ناکام کوشش کے بعد ملازمت سے فارغ کردیا گیا تھا۔

ڈاکٹر کو اس کو اس وقت ترکیہ کے مبلغ فتح اللہ گولن کی سربراہی میں ایک گروپ میں شامل ہونے کے الزام میں ایک سال کے لیے قید کیا گیاتھا۔

عرب میڈیا نے بتایا کہ ملزم ڈاکٹر استنبول کے علاقے بکیرکوئی اپنے کلینک میں کام کر رہا تھا کہ اسے 14 ستمبر کو حراست میں لیا گیا اور تفتیش جاری ہے۔

تاہم فی الحال یہ واضح نہیں کہ ڈاکٹر کو کس سزا کا سامنا کرنا پڑے گا۔

مقامی میڈیا کے مطابق ڈاکٹر بچوں کو بے ہوشی کرنے کے لیے کیٹامائن کا استعمال کرتا تھا . اس عمل سے متاثرہ بچوں کی تعداد تاحال معلوم نہیں ہوسکی ۔

استنبول کے پبلک پراسیکیوٹر کو 5 شکایات موصول ہوئیں۔ بعد میں 7 دیگر بچوں کی شہادتیں بھی سنی گئیں۔ یہ سب بچے اس ڈاکٹر کے پاس علاج کرانے گئے تھے۔

ترک صدر کا ایلون مسک سے ٹیسلا فیکٹری تعمیر کرنے کا مطالبہ

ٹیسلا کی ساتویں فیکٹری میکسیکو کی شمالی ریاست نیوو لیون میں زیر تعمیر ہے
اپ ڈیٹ 18 ستمبر 2023 11:31am
فوٹو — ڈیلی صباح
فوٹو — ڈیلی صباح

ترک صدر رجب طیب اردگان نے ایلون مسک سے ترکیہ میں ٹیسلا کی فیکٹری تعمیر کرنے کا مطالبہ کردیا۔

ترک خبر ایجنسی کے مطابق رجب طیب اردگان نے ایلون مسک سے نیو یارک میں اقوام متحدہ کے قریب واقع فلک بوس عمارت ترکش ہاؤس میں ایک ملاقات کے دوران یہ سوال کیا۔

رجب طیب اردگان اقوام متحدہ کی جنرل اسمبلی کے 78 ویں اجلاس میں شرکت کے لیے امریکہ میں ہیں۔

ٹیسلا اور واشنگٹن میں ترک سفارت خانے نے فوری طور پر خبر رساں ادارے روئٹرز کی جانب سے تبصرہ کرنے کی درخواستوں کا جواب نہیں دیا۔

ایلون مسک آج کیلیفورنیا میں اسرائیلی وزیر اعظم بینجمن نیتن یاہو سے بھی ملاقات کریں گے جس میں چیت مصنوعی ذہانت ٹیکنالوجی پر مرکوز ہوگی۔

ٹیسلا نے اگست میں بھارت میں ایک فیکٹری بنانے میں دلچسپی کا اظہار کیا تھا جو کم قیمت میں الیکٹرک کار تیار کرے گی۔

رپورٹ کے مطابق ٹیسلا کی اس وقت 6 فیکٹریاں ہیں اور وہ میکسیکو کی شمالی ریاست نیوو لیون میں ساتویں فیکٹری تعمیر کر رہی ہے۔

ایلون مسک نے مئی 2023 میں کہا تھا کہ کمپنی ممکنہ طور پر اس سال کے آخر تک ایک نئی فیکٹری کے لئے جگہ کا انتخاب کرے گی۔

یہ بھی پڑھیں:

گاڑی خریدنے کے خواہشمندوں کیلئے ”ایک پر ایک فری“ کی ناقابل یقین شاندار آفر

ٹویٹر میں برطرفیوں کے طوفان کے بعد کتنا عملہ باقی بچا ہے؟

رواں سال اب تک ٹیسلا کے حصص میں 123 فیصد اضافہ ہوا ہے اور آٹو میکر نے ہفتے کے روز کہا تھا کہ اس نے اپنی 50 لاکھ ویں کار تیار کی ہے۔